शिवसेना पक्षप्रमुख उद्धव ठाकरे मुंबईतील लिलावती रुग्णालयात रुटीन चेकअपसाठी दाखल झाले आहेत. लिलावती रुग्णालयाकडून उद्धव ठाकरे यांच्या प्रकृतीबाबत निवेदन देखील प्रसिद्ध करण्यात आले आहे. उद्धव ठाकरे 'रूटीन चेकअप'साठी बुधवारी रुग्णालयात दाखल झाले असून, त्यांच्या वैद्यकीय चाचण्यांचे अहवाल समाधानकारक आहेत. त्यांची प्रकृती ठणठणीत आहे आणि दुपारनंतर त्यांना डिस्चार्ज देण्यात येईल, असेही रुग्णालयाने प्रसिद्ध केलेल्या पत्रकात नमूद करण्यात आले आहे. २०१२ साली उद्धव ठाकरे यांची अँजिओप्लास्टी झाली होती. त्यावेळी मनसे अध्यक्ष राज ठाकरे उद्धव यांना भेटण्यासाठी रुग्णालयात गेले होते. तसेच त्यांना डिस्चार्ज मिळाल्यानंतर खुद्द राज यांनीच उद्धव यांना घरी आणले होते.
