मुंबई-पुणे महामार्गावर खंडाळानजीक रविवारी एसटी बस उलटून झालेल्या अपघातात १८ प्रवासी जबर जखमी झाले. जखमींवर खोपोली येथील लोकमान्य रुग्णालयात उपचार सुरू आहेत. गाडीचे ब्रेक निकामी झाल्यामुळे हा अपघात झाल्याचे समजते. सोलापूर येथून ठाण्याकडे जाणारी ही बस भोर घाटातील अंडा पॉइंट या ठिकाणी आली असता हा अपघात झाला. अपघात झाला त्यावेळी गाडीमध्ये ५५ प्रवासी होते. या अपघातामुळे जुन्या महामार्गावरील मुंबईकडे येणारी वाहतूक काही काळ विस्कळीत झाली होती. जखमींना तातडीने खोपोली येथील रुग्णालयात उपचारासाठी दाखल करण्यात आले.
