रिपाइं कार्यकर्त्यांकडून प्रांत कार्यालयावर मोर्चा; आमदाराच्या अटकेची मागणी भिवंडीतील युवक विकी ढेपे याच्या मृत्यूला जबाबदार असलेल्या आरोपींना तातडीने अटक करा आणि भाजप आमदार महेश चौघुले यांची आमदारकी रद्द करण्याच्या मागणीसाठी सोमवारी भिवंडीतील रिपाइं कार्यकर्त्यांनी मोर्चा काढला. धामणकर नाक्यापासून सुरू झालेला हा मोर्चा भिवंडी प्रांत कार्यालयापर्यंत काढण्यात आला होता. शहरातील सर्व दलित संघटनांनी या मोर्चामध्ये सहभाग नोंदवला. भिवंडीतील वाराळदेवीनगर (कामतघर) येथे मंगळवारी मध्यरात्री भाजप आमदार महेश चौघुले यांच्या समर्थकांनी तीन तरुणांवर प्राणघातक हल्ला केला होता. या हल्ल्यातील जखमी विकी ढेपे या तरुणाचा रविवारी दुपारी जे.जे.रुग्णालयात उपचारादरम्यान मृत्यू झाला. रविवारी भिवंडीमधील रिपाइं कार्यकर्त्यांनी भिवंडीत बंद पुकारला. धामणकर नाका परिसरात दुकाने बंद करून निदर्शने करण्यात आली. यावेळी जमावाला आवरण्यासाठी आलेल्या पोलिसांनाही जमावाने लक्ष केले. सोमवारी हजारोच्या संख्येने मोर्चेकरी रस्त्यावर उतरून भाजप सरकारचा निषेध व्यक्त करीत होते. आरोपींना तातडीने अटक करा आणि भाजप आमदारांची आमदारकी रद्द करून त्यांच्यावर गुन्हा दाखल करण्याची मागणी आंदोलनकर्त्यांनी केली. मोर्चा चौघुलेच्या कार्यालयासमोर आल्यानंतर काही काळ तणावाचे वातावरण होते.