जंगलात प्रत्येकाचा जगण्यासाठी संघर्ष सुरु असतो. जंगलात जिवंत राहायचं असेल तर कोणाची तरी शिकार करावी लागते किंवा कोणाला तरी शिकार व्हावी लागते. पण शिकार करताना जरा जरी आतताईपणा केला तर याची किती मोठी किंमत चुकवावी लागते याची कल्पना आपल्याला नसते. सध्या एक व्हिडिओ सोशल मीडियावर व्हायरल होत आहे. केनयातल्या मसाई मारातला हा व्हिडिओ आहे. एका सिंहिणीनं मोठ्या पाणघोड्याची शिकार करण्याचा प्रयत्न केला, पण पुढच्या काहीच सेकंदात असं धाडस करणं तिला खूपच महागात पडलं. पाणघोड जमिनीवर पहुडला आहे तेव्हा आपण त्याची सहज शिकार करू शकतो असं तिला वाटलं पण तिच्यापेक्षाही तो कैकपटीनं ताकदवान आहे याचा साधा अंदाजही तिला बांधता आला नाही. पाणघोड्याची शिकार करण्यासाठी तिने त्याच्यावर झडप मारली खरी पण डोळ्याची पापणी लवते न लवते तोच हा महाकाय प्राणी जमिनीवरून उठला आणि तिला तोंडात पकडून चितपट केलं. तेव्हा बिचाऱ्या या सिंहिणीला उपाशी पोटीच परतावं लागलं.
