भारतीय वैज्ञानिक मनिषा मोहन हिने असं उपकरण तयार केलंय की ज्यामुळे बलात्कार रोखता येणं शक्य होणार आहे. मनिषाने असा दावा केलाय की या उपकरणामुळे बलात्कार रोखता येतील आणि महिलांचा पाशवी अत्याचारापासून बचावही होईल. 'मॅसेच्युसेट्स इन्स्टिट्यूट ऑफ टेक्नॉलॉजी'मध्ये रिसर्च असिस्टंट म्हणून मनिषा काम करत आहे. हे उपकरण कपड्यावर कुठेही सहज चिटकवता येतं. यामध्ये विशिष्ट सेन्सॉर असणार आहे. जर कोणी बलात्कार करण्याचा प्रयत्न केला तर यातून पीडितेच्या घरी, कुटुंबियांना, मित्रमैत्रिणींना अलर्ट जाईल. त्याचप्रमाणे यातील अलार्ममुळे आजूबाजूला मोठा आवजाही ऐकू जाईल. त्यामुळे लोकांचं लक्ष वेधलं जाईल आणि ते मदतीला धावून येतील अशी माहिती मनिषाने 'पीटीआय'शी बोलताना दिली. एका विशिष्ट परिस्थितीत हे उपकरण काम करणार आहे. या उपकरणात 'अॅक्टीव्ह' आणि 'पॅसिव्ह' असे दोन मोड असणार आहेत. जर कोणी अतिप्रसंग करण्याचा प्रयत्न केला तर पीडित महिला बटन दाबून आपल्या मित्र मैत्रिणींना आणि पोलिसांना अलर्ट पाठवू शकते. अॅक्टीव्ह मोडमध्ये हे शक्य होणार आहे. तर समजा पीडित महिला स्वत:हून अलर्ट पाठवू शकली नाही तर पॅसिव्ह मोडमध्ये हे उपकरण स्वत:हून आजूबाजूच्या परिस्थितीचा आढावा घेऊन अलर्ट तिच्या मित्र मैत्रिणींना आणि नातेवाईकांना पाठवणार आहे असंही मनिषाने सांगितले.