घराला घरपण देणारी आधुनिक सजावट करून नुसते भागत नाही, तर त्या घराची आणि त्या घरात राहणाऱ्या प्रत्येकाची सुरक्षितता विचारात घेण्याच्या दृष्टिकोनातून काही नावीन्यपूर्ण उपाययोजना केलेल्या असणे आवश्यक असते. सद्य:स्थितीत घराच्या बाबतीत सर्वप्रथम सुरक्षितता महत्त्वाची असल्याचे आपण विसरून चालणार नाही. त्यासाठी कराव्या लागणाऱ्या उपाययोजना, सोयीसुविधा घराच्या मुख्य दरवाजापासून घरातील अत्यंत जोखमीच्या आणि मौल्यवान जिनसा ठेवण्याच्या जागेपर्यंत अभ्यासपूर्वक विचारात घ्यायला हव्यात. घराचे सौंदर्य आणि अंतर्बाहय़ सजावट हे जसे महत्त्वाचे असते तसेच संपूर्ण घराची, घरातील मालमत्तेची आणि घरातील कुटुंबीयांच्या सुरक्षिततेची खबरदारी घेणे अत्यंत आवश्यक असते.गृहसुरक्षितता आणि सजावट आपल्या दैनंदिन जीवनात आपण अनेकदा दिवसाची रात्र आणि रात्रीचा दिवस करून आपल्या कुटुंबासाठी आणि एकूणच आपल्या घरासाठी पैसे मिळवण्यासाठी धडपडत असतो. पै पै जमवलेली जमापुंजी आपण सुरक्षित ठेवण्यासाठी नेहमीच प्रयत्नशील असतो. मिळवलेल्या पैशाचे सुख आणि समाधान जसे आपल्याला हवे असते तसेच त्याची सुरक्षिततादेखील ठेवणे अनिवार्य असते. आपल्या मालमत्तेची गृह सजावट करत असताना शास्त्रीय दृष्टिकोनातून सुरक्षिततेच्या उपाययोजना करण्याचे नेमके महत्त्व काय आणि त्या कोणत्या प्रकारे करता येऊ शकतात, याचा अभ्यासपूर्वक विचार करणे जरुरीचे आहे. घराच्या सुरक्षाव्यवस्थेची गरज ही काही दिवस आपण घराबाहेर, अन्य ठिकाणी अथवा बाहेरगावी असल्यामुळे घर बंद राहणार असेल तर जशी असते तशीच गरज आपण घरात असतानादेखील तितकीच असते. प्रवेशद्वारावरील सुरक्षा योजना हल्ली नव्याने बांधलेल्या अनेक इमारतींमध्ये प्रत्येक घराच्या आणि त्या घरातील कुटुंबीयांच्या सुरक्षिततेसाठी विविध उपाययोजना राबवलेल्या असतात. त्या जर पुरवल्या गेल्या नसतील तर निश्चितच आपण त्यांचा अभ्यासपूर्वक विचार करून वापर केला पाहिजे. घराच्या मुख्य दाराबाहेर अधिक सुरक्षेसाठी अजून एक दार अर्थात एम.एस. सेफ्टी डोअर अनेक ठिकाणी बसवले जाते; परंतु त्याचबरोबर त्या ठिकाणी सुरक्षा यंत्रणा कार्यान्वयित होणे अधिक महत्त्वाचे असते. सीसी टीव्ही कॅमेरा मुख्य दरवाजाच्या बाहेर लावलेला असेल तर निश्चितच आपण घरात असलो अथवा नसलो तरीही आपल्याकडे किंवा घरापाशी कोण येऊन गेले हे कधीही पाहता येऊ शकते. ही अधिक सोयीस्कर, प्रचलित, माफक खर्चात होणारी, अनेक फायदे देणारी आणि म्हणूनच अनेकांना पसंत पडलेली सुरक्षा योजना आहे. हल्ली या योजनेचा वापर आपल्या मोबाइलवरदेखील आपण करू शकत असल्याने कोणत्याही ठिकाणी, कोणत्याही वेळी घरापाशी घडणाऱ्या घडामोडी आपण मोबाइलवर बघू शकतो. प्रवेशद्वारावरील सुरक्षा योजनेचे विविध प्रकारप्रवेशद्वारावरील सुरक्षा योजनेचे विविध आधुनिक प्रकार सध्या बाजारात उपलब्ध आहेत. डोअर कॅमेरा, सीसी टीव्ही कॅमेरा, अ‍ॅक्सेस कंट्रोल लॉक, बायोमेट्रिक लॉक, इंटरकॉम, टेलिकम्युनिकेशन सिस्टम, डिजिटल लॉक्स, नंबरिंग लॉक्स, रिमोट कंट्रोल लॉक्स, डोअर कॅमेरा विथ फोन, रिमोट अ‍ॅक्सेस कॅमेरा, कॉम्प्युटराइज्ड मेसेज सिस्टम, मेसेज अलर्ट सिस्टम, सिक्युरिटी सायरन, स्मोक डिटेक्टर, फायर अलार्म सिस्टम अशा विविध प्रकारांतून आपल्या घराला साजेशी आणि आपल्याला आर्थिकदृष्टय़ा परवडेल अशी निदान एखादी तरी सुरक्षा योजना आपण कार्यान्वयित करून घ्यावीच. अंतर्गत संरचनेतील सुरक्षा व्यवस्था घरातून बाहेर पडल्यानंतर जर घरातील एअरकंडिशनर, टय़ुबलाइट, फॅन अथवा एखादे किचनमधील इलेक्ट्रिकल अथवा इलेक्ट्रॉनिक उपकरण सुरू राहिले असेल, तर ते घराबाहेर असताना रिमोटच्या साहाय्याने बंद करता येते. त्यामुळे निश्चितच आपण एखादा अनर्थ टाळू शकतो. घरातून बाहेर पडण्यापूर्वीच आपण योग्य ती काळजी घेतली, तर प्रश्नच निर्माण होणार नाहीत. घरातील अंतर्गत संरचना करत असताना अनेक बाबींचा विचार करून सुरक्षिततेच्या दृष्टीने काही उपाययोजना करता येऊ शकतात. सर्वप्रथम संरचना करताना त्या घरात हवा अधिकाधिक खेळती राहिली पाहिजे, हा विचार होणे जरुरीचे असते. संकटसमयी याचा उपयोग अधिक होतो. घरातील फर्निचर हे अधिकतर लाकूड आणि प्लायवूड वापरूनच केले जाते. अनेकदा वायरिंगचे काम करताना त्यामुळे विशेष काळजी घेणे जरुरीचे असते. आपल्या घरात अत्यंत महत्त्वाच्या कागदपत्रांसाठी निदान एखादे छोटेसे फायरप्रूफ फायलिंग कॅबिनेट (एफआरएफसी) असावे. घरामध्ये कोणत्याही कारणामुळे आगीचा धोका निर्माण झाला, तर त्वरित काही जुजबी उपाययोजना उपयोगात आणणे उपयुक्त ठरते. विजेच्या उपकरणांची निवड करत असताना विशेष काळजी घ्यावी लागते. घरातील सुरक्षेसाठी उपलब्ध विविध पर्यायघराच्या अंतर्गत सुरक्षिततेच्या दृष्टिकोनातून विजेची उपकरणे तसेच स्वयंपाकघरातील गॅस या दोन्ही बाबींमुळे आपल्याला विशेष काळजी घ्यावी लागते. अनेकदा या कारणांमुळेच काही अपघात घडल्याचे आपण ऐकत असतो. तत्सम घटना घडल्याच, तर काही त्वरित उपाययोजना करण्यासाठी आपले घर आणि त्या वेळी घरात उपस्थित असणारी व्यक्ती सज्ज असली पाहिजे तसेच त्या परिस्थितीचा सहजरीत्या सामना करू शकली पाहिजे. गॅसच्या बाबतीत आपण स्वत: आवश्यक ती काळजी जरूर घेऊ शकतो; परंतु विजेच्या उपकरणांची काळजी घेणे हे त्यासंबंधी माहिती असेल तरच शक्य होऊ शकते. गृहसजावट करताना अनेकदा विद्युतीकरण आणि लाकडी फर्निचर यांचे काम एकत्रितपणे केले जात असते. अशा वेळेला वापरल्या जाणाऱ्या मालाची निवड नीट केलेली असणे आवश्यक असते. प्रगत तंत्रज्ञान वापरून बनवलेली सुरक्षेची उपकरणे सध्या बाजारात प्रगत तंत्रज्ञान वापरून बनवलेली संगणकीकृत सुरक्षिततेची विविध उपकरणे उपलब्ध आहेत. काही उपकरणांचा वापर आपण आपल्या मोबाइलद्वारे कोठूनही करू शकतो. क्लोज सर्किट टीव्ही कॅमेराच्या साहाय्याने आपल्या मोबाइलवरदेखील आपण घरातील अथवा प्रवेशद्वाराच्या ठिकाणच्या हालचाली आणि घडणाऱ्या घडामोडी बघू शकतो. अलार्म सिस्टमदेखील प्रवेशद्वाराला बसवता येऊ शकते. स्मोक डिटेक्टर, फायर अलार्म अशा आधुनिक वस्तूदेखील हल्लीच्या दिवसांमध्ये गृहसजावट करताना विचारात घेणे उपयुक्त ठरते. अशा अनेकविध बाबींचा अभ्यासपूर्वक विचार करून आपल्या घराची सुरक्षिततेच्या बाबतीत उपाययोजना करावी लागत असल्यामुळे एकूणच अंतर्गत सजावट करण्याचे स्वरूप मर्यादित न राहता व्यापक आणि अत्यंत आधुनिक होऊ शकते. सुरक्षितता ही काळाची गरज आहे हे लक्षात घेऊन केलेले गृहसजावटीचे काम निश्चितच आपले निराळेपण आणि सतर्कता सिद्ध करू शकणार आहे. शैलेश कुलकर्णी -sfoursolutions1985@gmail.comइंटिरीअर डिझायनर
