‘झुमके’ हा कानातल्या दागिन्यांचा प्रकार सध्या सगळ्या पारंपरिक पेहरावांवर सध्या हिट झालाय. तसा तो दक्षिण भारतात सगळीकडेच फेमस. महाराष्ट्रात या दागिन्याला पूर्वी ‘भोकर’ किंवा ‘घोस’, ‘झुंबरं’ असं म्हटलं जायचं. हल्ली ‘मांगटिका’ म्हणून फॅशन रॅम्पवरही पॉप्युलर झालेल्या दागिन्याला पूर्वी ‘भांगसर’ आणि ‘बिजवरा’ असं म्हटलं जायचं. द्वितीयेच्या चंद्रकोरीच्या आकाराची बिंदी म्हणजे बिजवरा. दण्डावर घातल्या जाणाऱ्या ‘आर्मलेट’ची ट्रेण्डी वाटणारी डिझाईन्स पूर्वीच्या ‘नागोत्र’ अलंकाराशी जवळीक साधते. पूर्वीचा ‘कंबरपट्टा’ही सध्या फॅशनमध्ये दिसतोय. ‘गोठ’ आणि ‘तोडे’ नव्या डिझाईन्सचे ‘ब्रेसलेट’ म्हणून समोर येताहेत. लमाणी स्त्रियांचा ‘वाळा’ हे पायात घालायचं कडं पुन्हा एकदा नव्याने मुलींच्या पायात दिसू लागलंय. केवळ पारंपरिक पेहरावावर नव्हे तर लेगिंग- कुर्ती, जीन्स, ड्रेस अशा आधुनिक पेहरावावरही यातले काही दागिने घालता येतात.
