मोनिका किरणापुरे या अभियांत्रिकीला शिकणाऱ्या महाविद्यालयीन विद्यार्थिनीची चार वर्षांपूर्वी भरदिवसा झालेली हत्या संपूर्ण देशाला सुन्न करून गेली. त्याचे पडसादही सर्वदूर उमटले होते. सोमवारी या खटल्याचा निकाल जाहीर होऊन दोषींना जन्मठेपेची शिक्षा ठोठावण्यात आली. मात्र, त्यावर तिच्या आईवडिलांनी आणि सरकारी पक्षानेही असमाधान व्यक्त करून शिक्षेला उच्च न्यायालयात आव्हान देण्याचा मनोदय व्यक्त केला. दुसरीकडे ज्या वसतिगृहात मोनिका राहात होती तेथेही सोमवारी सुन्न करणारे वातावरण होते.
