Abhishek Sharma

यंदाच्या वर्ल्डकपमधलं सगळ्यात चर्चित नाव. भारताचा दिग्गज अष्टपैलू खेळाडू युवराज सिंगच्या मार्गदर्शनात तयार झालेला शिष्य.प्रतिस्पर्धी संघ किंवा गोलंदाज कोण आहे याची तमा न बाळगता झंझावाती आक्रमण करण्यात निपुण. टी२० प्रकारात पॉवरप्लेची सहा षटकं सामन्याची दिशा पालटवतात. पॉवरप्लेच्या आणि एकूणच सामन्याचं पारडं भारताच्या दिशेने नेण्यात अभिषेकचा सिंहाचा वाटा. अभिषेकने मधल्या फळीत खेळायला सुरुवात केली मात्र सलामीला येऊन तो किमयागार ठरू शकतो हे प्रशिक्षकांनी ओळखलं. क्षेत्ररक्षणाचे निर्बंध हटल्यानंतरही सातत्याने चौकार, षटकार वसूल करण्यात वाकबगार. अभिषेकला सूर गवसला तर प्रतिस्पर्धी संघ निरुत्तर होतो. फलंदाजीच्या बरोबरीने उपयुक्त फिरकीपटू आणि चपळ क्षेत्ररक्षक. टी२० प्रकारात भारतासाठी खेळताना दोन शतकं आणि ८ अर्धशतकं अभिषेकच्या नावावर आहेत. दोनशेच्या स्ट्राईकरेटने फटकेबाजी करणाऱ्या अभिषेकला पाहणं ही चाहत्यांसाठी पर्वणी ठरते. आयपीएल स्पर्धेत सनरायझर्स हैदराबाद संघातर्फे खेळताना ट्रॅव्हिस हेडच्या बरोबरीने खणखणीत सलामी दिली आहे. मोठ्या धावसंख्या उभारणं किंवा त्याचा पाठलाग असो- अभिषेकची खेळी सामन्याचं निर्णायक ठरू शकते. सुनील गावस्कर, रवी शास्त्री यांच्यासह असंख्य माजी खेळाडूंनी अभिषेक वर्ल्डकपचा स्टार खेळाडू असेल असं भाकीत वर्तवलं आहे.