अमित ठाकरे (Amit Thackeray) हे महाराष्ट्र राज्यातील नेते आहेत. ते महाराष्ट्र नवनिर्माण सेना पक्षाचे अध्यक्ष राज ठाकरे आणि शर्मिला ठाकरे यांचे सुपुत्र आहेत. त्यांचा जन्म २४ मे १९९२ रोजी मुंबईमध्ये झाला. अमित ठाकरे यांनी प्राथमिक शिक्षण पूर्ण केल्यानंतर पुढे मुंबईतील नामांकित अशा पोद्दार महाविद्यालयात प्रवेश घेतला. त्यांनी वाणिज्य शाखेची पदवी मिळवली आहे. त्यांना वडील राज ठाकरे यांच्याप्रमाणे स्केचिंग आणि पेंटिंग करण्याची आवड आहे. त्याशिवाय त्यांना फुटबॉल खेळण्याचा छंद आहे. ते या खेळाचे मोठे चाहते आहे.
अमित ठाकरे हे लहानपणापासून माध्यमांपासून लांब राहत आले आहेत. त्यांच्या बहिणेचे नाव उर्वशी ठाकरे असे आहे. अमितप्रमाणे त्याही प्रकाशझोतात राहणं टाळतात. अमित ठाकरे यांच्या पत्नीचे नाव मिताली बोरुडे असे आहे. अमित आणि मिताली यांची पहिली भेट महाविद्यालयात असताना झाली. पुढे त्यांच्यात मैत्री होऊन मैत्रीचे रुपांतर प्रेमात झाले. २०१७ मध्ये अमित ठाकरे खूप आजारी पडले होते. त्यांच्या आजारपणामुळे ठाकरे कुटुंब फार चिंतेत होते. याचा काहीसा परिणाम राज ठाकरे यांच्यावरही झाला. त्या काळात राज यांनी कुटुंबाकडे लक्ष दिले होते. अमित यांच्या आजारापणात मिताली यांनी त्यांची फार काळजी घेतली. त्यात त्यांच्यातील नातेसंबंध अधिक घट्ट झाले. २०१९ मध्ये त्यांनी लग्न केले. २०२२ मध्ये या दांपत्याला पुत्ररत्न लाभले. त्यांच्या मुलाचे नाव किआन ठाकरे असे आहे.
अमित ठाकरे हे प्रकाशझोतापासून लांब राहत असले तरी त्यांनी राज यांना संपूर्ण राजकीय प्रवास जवळून पाहिला होता. कालांतराने त्यांनीही राजकारणामध्ये रस घ्यायला सुरुवात केली. २०१६-१७ पासून ते महाराष्ट्र नवनिर्माण सेना पक्षाच्या स्थानिक स्तरावरील राजकारणामध्ये सहभाग घ्यायला सुरुवात केली. २०२० मध्ये राज ठाकरे यांंनी जाहीर सभा घेत पक्षाच्या नव्या ध्वजाची आणि नव्या धोरणांबाबतची घोषणा केली. या सभेमध्ये त्यांनी अमित ठाकरेंच्या राजकीय प्रवेशाची घोषणा देखील केली. २०२० पासून ते आतापर्यंत अमित मनसे पक्षाच्या प्रमुख नेत्यांपैकी एक मानले जातात. काही महिन्यांपूर्वी टोल प्रकरणावरुन अमित चर्चेत आले होते. एका टोल नाक्यावर त्यांची गाडी अडवण्यात आली. यावरुन वाद पेटला. तेव्हा मनसेच्या कार्यकर्त्यांनी त्या टोलनाक्याची तोडफोड केली होती.