संजू सॅमसन Videos

सूर गवसला तर संजू सॅमसन आव्हानात्मक खेळपट्टीवरही तुफान फटकेबाजी करू शकतो. संजूला तो सूर लवकरात लवकर गवसावा अशी प्रार्थना भारतीय क्रिकेटरसिक मनोमन करत आहेत. न्यूझीलंडविरुद्धच्या नुकत्याच झालेल्या मालिकेत संजूची कामगिरी यथातथाच राहिली मात्र अनुभव आणि या प्रकारातली कामगिरी त्याच्या बाजूने आहे. संजू आणि अभिषेक शर्मा ही बिनीची जोडी भारतीय संघाला मोठ्या धावसंख्येचा पाया रचून देते. फिरकी आणि वेगवान अशा दोन्ही प्रकारच्या गोलंदाजीविरुद्ध तडफेने फटकेबाजी करण्याची संजूकडे क्षमता आहे. आयपीएल स्पर्धेत संजूने राजस्थान रॉयल्सचं नेतृत्व केलं आहे. त्यांच्यातर्फे खेळताना वादळी खेळी साकारल्या आहेत. प्रमुख फलंदाज आणि कर्णधार असतानाच यष्टीरक्षणाचीही भूमिका हाताळली आहे. इशान किशन फॉर्मात असल्यामुळे संजूला वर्ल्डकपदरम्यान राखीव खेळाडूंमध्ये बसावं लागू शकतं. चेटा या टोपणनावाने ओळखल्या जाणाऱ्या संजूचा देशात आणि देशाबाहेरही प्रचंड असा चाहतावर्ग आहे. टी२० प्रकाराचा प्रचंड अनुभव ही संजूसाठी जमेची बाजू आहे. मात्र त्याला कामगिरीत सातत्य राखण्याची नितांत आवश्यकता आहे.