सूर्यकुमार यादव News

मैदानाच्या कोणत्याही कोपऱ्यात चेंडू भिरकावून देण्याची क्षमता असलेला किमयागार. अद्भुत फटकेबाजीसाठी न्यू ३६० या नावाने प्रसिद्ध. टी२० क्रिकेटमध्ये भारतासाठी पदार्पण करताना पहिल्याच चेंडूवर षटकारासह सुरुवात. आयसीसी टी२० फलंदाजांच्या क्रमवारीत सातत्यपूर्ण प्रदर्शनासह अव्वल स्थान पटकावणारा शिलेदार. सूर्यकुमारच्या नेतृत्वात पहिल्यांदाच भारतीय संघाची वर्ल्डकपवारी. टी२० प्रकारात कर्णधार म्हणून अतिशय खणखणीत कामगिरी. आयपीएल स्पर्धेत कोलकाता नाईट रायडर्स संघासाठी फिनिशर म्हणून स्वत:ला सिद्ध केलं. २०१८ पासून मुंबई इंडियन्स संघाचा फलंदाजीतील आधारवड. मुंबई इंडियन्ससाठी केलेल्या दमदार प्रदर्शनाच्या बळावरच भारतीय संघात स्थान पटकावलं. दोन वर्षांपूर्वी टी२० वर्ल्डकपविजेत्या संघाचा अविभाज्य घटक. २०२४ वर्ल्डकपच्या फायनल लढतीत डेव्हिड मिलरचा अद्भुत झेल टिपत भारतीय संघाच्या विजयात निर्णायक भूमिका. टी२० प्रकारात चार शतकं नावावर असणाऱ्या सूर्यकुमारला आयसीसीने २०२२ आणि २०२३ मध्ये टी२० क्रिकेटर ऑफ द इयर पुरस्काराने गौरवलं. अस्सल मुंबईकर सूर्या त्याच्या अनोख्या सुपला फटक्यासाठी प्रचंड लोकप्रिय आहे. तिशीत म्हणजे तुलनेने उशिरा पदार्पणाची संधी मिळूनही सूर्यकुमारने कामगिरीच्या जोरावर या संधीचं सोनं केलं. कपिल देव, महेंद्रसिंग धोनी आणि रोहित शर्मा या वर्ल्डकपविजेत्या भारतीय कर्णधारांच्या मांदियाळीत स्थान पटकावण्यासाठी सूर्यकुमार आतूर आहे.