Washington Sundar

दुखापतीमुळे वॉशिंग्टन वर्ल्डकप खेळू शकेल का याविषयी साशंकता आहे. मात्र खेळू शकल्यास भारतीय संघासाठी आनंदाची गोष्ट असेल. फलंदाजी करू शकणारा गोलंदाज आणि गोलंदाजी करू शकणारा फलंदाज अशी वॉशिंग्टनची दुहेरी ओळख आहे. विकेट्स पटकावण्यात आणि धावा रोखण्यात वाकबगार वॉशिंग्टन परिस्थितीनुरुप फलंदाजी करतो. फिरकी आणि वेगवान अशा दोन्ही प्रकाराच्या गोलंदाजांविरुद्ध तो सहजी खेळतो. याबरोबरीने चपळ क्षेत्ररक्षक असल्याने वॉशिंग्टन संघात असणं उपयुक्तच आहे. रवीचंद्रन अश्विनचा वारसदार म्हणून त्याच्याकडे पाहिलं जात आहे. संकटप्रसंगी हमखास धावून येणारा तारणहार अशी प्रतिमा असल्यामुळे त्याच्या फिटनेसकडे संघाचं बारीक लक्ष आहे. आयपीएल स्पर्धेत गुजरात टायटन्स, रायझिंग पुणे सुपरजायंट्स, रॉयल चॅलेंजर्स बंगळुरू, सनरायझर्स हैदराबाद अशा विविध संघांसाठी वॉशिंग्टनने नेहमीच चांगली कामगिरी केली आहे. फलंदाजी क्रमांक आणि भूमिका स्पष्ट नसणं आणि दुखापतींचा ससेमिरा या वॉशिंग्टनसंदर्भात काळजीच्या गोष्टी आहेत.