एकेकाळची ब्लू चिप कंपनी ‘नॅशनल ऑरगॅनिक केमिकल्स लिमिटेड’ अथवा ‘नोसिल’ हे नाव जुन्या आणि जाणकार गुंतवणूकदारांसाठी तरी नवीन नाही. गेल्या चार दशकांहून अधिक काळ कार्यरत, सुरुवातीला पेट्रो केमिकल्स आणि नंतर रबर केमिकल्स व्यवसायात असलेली ही कंपनी आहे. अरविंद मफतलाल समूहातील ही कंपनी भारतातील या क्षेत्रातील सर्वात मोठी कंपनी असून काही थोडय़ा नावाजलेल्या अग्रगण्य कंपन्यांपैकी एक आहे. पॉलिओलिफिन्स या कंपनीचे नोसिलमध्ये विलीनीकरण झाल्यानंतर कंपनीने रबर केमिकल्समध्ये आपले स्थान पक्के केले. आपल्या गुणवत्तेच्या जोरावर जागतिक बाजारपेठेतदेखील मानाचे स्थान पटकावणाऱ्या नोसिलकडे आज पिलफ्लेक्स, पिलक्युअर, पिलनोक्स, पिलगार्ड ई. नावाजलेले ब्रॅण्ड्स आहेत. चार वर्षांपूर्वी गुजरातमधील दहेजमध्ये कंपनीने नवीन तंत्रज्ञान वापरून उत्पादनाला सुरुवात केली. पर्यावरणामुळे चीनमधील बाधित झालेली उत्पादन क्षमता, भारतात आयातीवर घातलेले र्निबध आणि टायर कंपन्यांची वाढती मागणी याचा सकारात्मक परिणाम कंपनीच्या कामकाजावर झालेला दिसतो. कंपनी आपल्या दोन्ही म्हणजे नवी मुंबई व दहेज येथील कारखान्यांची उत्पादन क्षमता वाढवत असून सप्टेंबर २०१८ पर्यंत ही क्षमता वाढून त्याचे परिणाम पुढील आर्थिक वर्षांत दिसू लागतील. आपले सर्व कर्ज फेडून जवळपास कुठलेच कर्ज नसलेली नोसिल पुन्हा एकदा गुंतवणूकदारांना फायदा करून देणार का हे काळच ठरवेल. सध्या शेअर बाजारात तेजीचे वातावरण असल्याने सगळ्याच शेअर्सचे भाव त्यांच्या ५२ आठवडय़ांच्या शिखरावर आहेत. त्यामुळे बाजारात थोडी मंदी आल्यास साधारण ८५ रुपयांपर्यंत हा शेअर मिळू शकतो. अर्थात, दीर्घकालीन गुंतवणूकदारांनी टप्प्याटप्प्याने खरेदी केल्यासही हा परिणाम साधता येऊ शकेल. सूचना : प्रस्तुत लेखामध्ये सुचविलेल्या कंपनीच्या शेअर्समध्ये लेखकाची वा त्याच्या जवळच्या नातेवाईकांची (उपलब्ध माहितीप्रमाणे) कुठलीही गुंतवणूक नाही किंवा असल्यास ती कंपनीच्या भरणा झालेल्या भागभांडवलाच्या एक टक्क्यापेक्षा कमी आहे. तसेच सुचविलेल्या कंपनीशी लेखकाचा कुठलाही संबंध नसून त्याने कंपनीकडून कुठलेही मानधन अथवा भेटवस्तू घेतलेली नाही. नोसिल लिमिटेड (बीएसई कोड - ५००७३०) स्मॉल कॅप समभाग प्रवर्तक: अरविंद मफतलाल समूह बाजारभाव (रु.) १०६.५५ उत्पादन/ व्यवसाय रबर केमिकल्स भरणा झालेले भागभांडवल (रु.) १६३.८४ कोटी पुस्तकी मूल्य (रु.) ३४.३४ दर्शनी मूल्य (रु.) १०/- लाभांश (%) १२% प्रति समभाग उत्पन्न (रु.) ६.३ पी/ई गुणोत्तर १६.२६ समग्र पी/ई गुणोत्तर ३२ डेट/इक्विटी गुणोत्तर ०.०६ इंटरेस्ट कव्हरेज गुणोत्तर ५० रिटर्न ऑन नेटवर्थ (%) १७.६४ बीटा १.४ बाजार भांडवल (कोटी रु.) १,७३७ ५२ आठवडय़ातील उच्चांक/ नीचांक (रु.) १११/ ४७.०० शेअर होल्डिंग पॅटर्न (%) प्रवर्तक ३६.९७ परदेशी गुंतवणूकदार ४.९३ बँक/ म्यु. फंड / सरकार २.२८ इतर ५५.८२ शेअर बाजारातील व्यवहार हे बाजारातील जोखमीच्या अधीन आहेत. गुंतवणूक करण्यापूर्वी आपल्या गुंतवणूक सल्लागाराचा सल्ला घेणे आवश्यक आहे.
