देशातील औद्योगिक उत्पादन गेल्या दोन महिन्यांनंतर प्रथमच वाढ ले आहे. सकारात्मक स्थितीत पोहोचताना ते मार्चमध्ये २२.४ टक्के नोंदले गेले आहे. निर्मिती, खनिकर्म तसेच ऊर्जा क्षेत्रातील कामगिरीच्या जोरावर यंदा उणेस्थितीतून सकारात्मक होत २० टक्क्यांपुढे पोहोचले आहे. औद्योगिक उत्पादन दरामध्ये सर्वाधिक, ७७.६३ टक्के हिस्सा राखणाऱ्या निर्मिती क्षेत्राची वाढ यंदाच्या मार्चमध्ये २५.८ टक्के राहिली आहे. तर खनिकर्म क्षेत्र ६.१ टक्क्याने विस्तारले आहे. ऊर्जानिर्मिती २२.५ टक्क्यांनी वाढली आहे. वर्षभरापूर्वी, मार्च २०२० मध्ये औद्योगिक उत्पादन दर उणे १८.७ टक्के होता. करोना साथ प्रसारानंतर महिन्याच्या मध्यानंतर लागू झालेल्या टाळेबंदीचा हा विपरीत परिणाम होता. त्यानंतर हा दर जवळपास ऑगस्ट २०२० पर्यंत सतत उणे स्थितीत होता. सप्टेंबर २०२० मध्ये हा दर अवघ्या एक टक्क्याने वाढला होता. तर ऑक्टोबरमध्ये तो ४.५ टक्के नोंदला गेला. नोव्हेंबरमधील उणे स्थितीनंतर डिसेंबरमध्ये तो पुन्हा वाढून २.२ टक्के झाला होता.
