व्यापार प्रतिनिधी, मुंबई भांडवली बाजारात निर्देशांकांत कमालीची पडझड सुरू असताना बाजार भांडवलाबाबत अव्वल असलेल्या रिलायन्स इंडस्ट्रिजचे समभाग मूल्य मात्र उंचावत राहिले. भांडवली बाजारात सोमवारी ईदनिमित्त सुटीमुळे व्यवहार बंद असताना, रिलायन्स इंडस्ट्रीजने फिक्स्ड लाइन दूरध्वनी क्षेत्रात शिरकाव करण्याचा निर्णय जाहीर केला. त्याचबरोबर विदेशातील दोन कंपन्यांना समूहाच्या तेल व वायू व्यवसायातील हिस्सा विकून कर्जभार कमी करण्याची भूमिका स्पष्ट केली होती. मंगळवारी मात्र भांडवली बाजारात त्याची अपेक्षित प्रतिक्रिया रिलायन्सच्या समभागामध्ये उमटली. एकाच व्यवहारात कंपनीचे बाजार भांडवल ७१,६३८ कोटी रुपयांनी वाढले परिणामी रिलायन्सच्या समभागाचे मूल्य मंगळवारच्या व्यवहारात १२.०९ टक्क्यांनी झेपावले. शुक्रवारच्या तुलनेत ते मंगळवारअखेर १,२७५ रुपयांवर, ९.७२ टक्क्यांच्या उसळीसह बंद झाले. वाहन समभागांची मात्र गटांगळी.. मुंबई : देशातील वाहन क्षेत्राबाबत निर्मिती संघटनेने जाहीर केलेल्या चिंताजनक आकडेवारीने भांडवली बाजारात सूचिबद्ध वाहन निर्मिती कंपन्यांच्या समभागांच्या मूल्यांनीही गटांगळी खाल्ली. वाहन क्षेत्रातील समभागांचे मूल्य व्यवहारात ९ टक्क्यांपर्यंत रोडावले. यामध्ये प्रत्यक्ष वाहन निर्मिती तसेच वाहनांसाठी सुटे भाग तयार करणाऱ्या कंपन्यांचाही समावेश राहिला. वाहन निर्मिती संघटना ‘सिआम’ने जुलैमधील वाहन विक्री कल जाहीर करताना या क्षेत्राने दोन दशकातील सर्वात मोठी विक्री घसरण नोंदविल्याचे स्पष्ट केले. मदरसन सुमी सिस्टीम्स रु. ९७.२५ -८.९४% भारत फोर्ज रु. ४००.७० -६.१३% महिंद्र अँड महिंद्र रु. ५१२.३० -६.११% बॉश रु. १३,५१७.२५ -५.४३% आयशर मोटर्स रु. १६,६४६.०५ -५.३१% टीव्हीएस मोटर कंपनी रु. ३६९.०५ -५.०७% मारुती सुझुकी रु. ५८१२.९५ -४.७२% अशोक लेलँड रु. ६१.५५ -४.३५% अपोलो टायर्स रु. १५८.८५ -२.३४% हिरो मोटोकॉर्प रु. २५६५.०० -२.१४% * मंगळवारचा ‘बीएसई’वरील बंद स्तर
