विआन इंडस्ट्रिजविरुद्ध कारवाई मुंबई : पॉर्न फिल्म प्रकरणातील राज कुंद्रा व पत्नी- अभिनेत्री शिल्पा शेट्टी यांना सेबीने बुधवारी दंड ठोठावला. उभयतांच्या विआन इंडस्ट्रीजवर समभाग गैरव्यवहारप्रकरणी कारवाई करताना भांडवली बाजार नियामकाने ३ लाख रुपये भरण्याचा आदेश जारी केला. हिंदुस्थान सेफ्टी ग्लास इंडस्ट्रीज म्हणून ओळखले जाणाऱ्या विआन इंडस्ट्रीजचे राज व शिल्पा प्रवर्तक आहेत. १० कोटी रुपयांचे बाजार भांडवल असणारी विआन इंडस्ट्रीज भांडवली बाजारात सूचिबद्ध कंपनी आहे. राज ऊर्फ रिपू सुदन कुंद्रा व शिल्पा शेट्टी कुंद्रा संचालक असलेल्या विआन इंडस्ट्रीजची सप्टेंबर २०१३ ते डिसेंबर २०१५ दरम्यान करण्यात आलेल्या चौकशीवर आधारित ही कारवाई करण्यात आली आहे. ऑक्टोबर २०१५ मध्ये विआन इंडस्ट्रीजने २.५७ कोटी रुपयांचे ५ लाख समभाग कुंद्रा दाम्पत्यासह चार जणांना जारी केले होते. मात्र याबाबतच्या कायदेशीर नियमांचे पालन झाले नसल्याचा ठपका सेबीने ठेवला आहे. याबाबत नियामकाला कळवले नसल्याचेही सेबीने बुधवारी स्पष्ट केले.
