पुणे : सहकार क्षेत्रातील आघाडीच्या बँकांपैकी एक असलेल्या कॉसमॉस को-ऑपरेटिव्ह बँकेला ३१ मार्च २०२२ अखेर सरलेल्या आर्थिक वर्षांत ३५० कोटी रुपयांचा ढोबळ नफा, तर ६५.९१ कोटी रुपयांचा करपश्चात निव्वळ नफा झाला आहे. या पार्श्वभूमीवर बँकेच्या मंगळवारी पार पडलेल्या ११६ व्या वार्षिक सर्वसाधारण सभेत सरलेल्या २०२१-२२ आर्थिक वर्षांकरिता सभासदांना ८ टक्के लाभांश देण्याचा प्रस्ताव ठेवण्यात आला, अशी माहिती बँकेचे अध्यक्ष सनदी लेखापाल मिलिंद काळे यांनी दिली. वार्षिक सर्वसाधारण सभेत बँकेच्या प्रगतीचा आढावा घेण्यात आला. मार्च २०२२ अखेर सरलेल्या आर्थिक वर्षांत बँकेची आर्थिक स्थिती समाधानकारक असून एकूण राखीव निधी १,७६५ कोटी रुपयांवर पोहोचला आहे. बँकेच्या भांडवल पर्याप्ततेचे प्रमाण (सीआरएआर) १३.१९ टक्के आहे. बँकेकडील ठेवी सरलेल्या वर्षांत १६,५२२ कोटींवर पोहोचल्या आहेत. तर बँकेने १२,२९२ कोटींचे कर्जवितरण केले. या काळात बँकेचा एकूण व्यवसाय २८,८०० कोटींहून अधिक झाल्याची माहिती काळे यांनी दिली.