मुंबई : आजवरच्या परंपरेप्रमाणे द्विपक्षीय वाटाघाटीच्या प्रथेपासून फारकत घेत बँक व्यवस्थापनाच्या एकतर्फी निर्णय लादण्याचा निषेध म्हणून, ‘अखिल भारतीय बँक कर्मचारी महासंघ (एआयबीईए)’ने येत्या १९ नोव्हेंबररला एक दिवसाच्या देशव्यापी लाक्षणिक संपाची हाक दिली आहे. पुढील आठवडय़ात शनिवारी होत असलेल्या संपामुळे, बँकांच्या शाखातील कामकाजावर परिणाम होण्यासह सलग सुट्टय़ांमुळे एटीएममध्ये खडखडाट होण्याची शक्यता आहे. आजच्या घडीला देशातील अनेक बँकांमध्ये कर्मचारी व व्यवस्थापनाच्या दरम्यान बँकनिहाय प्रश्नावरून तणावाचे वातावरण निर्माण झाले आहे. सरकारच्या जीवन ज्योती, जीवन सुरक्षा, अटल पेन्शन, मुद्रा, स्वनिधी व तत्सम विविध योजना राबवण्याची जबाबदारी बँक कर्मचारी पार पाडत आहेत. आधीच अपुरा कर्मचारी वर्ग, कामाचा वाढता बोजा असताना, व्यवस्थापनाच्या मनमानी धोरणामुळे कर्मचाऱ्यांमध्ये विफलतेची भावना निर्माण झाली आहे, असे महासंघाचे महाराष्ट्राचे सरचिटणीस देवीदास तुळजापूरकर यांनी सांगितले. व्यवस्थापनाची ही मनमानी आणि सरकारच्या बँकांच्या खासगीकरणाच्या धोरणाचा विरोध म्हणून महासंघाचे विविध बँकांतील तीन लाखांहून अधिक कर्मचारी सभासद संपात सहभाग घेत असल्याचे त्यांनी सांगितले. ‘इंडियन बँक्स असोसिएशन’ला एआयबीईएच्या वतीने मंगळवारी संपाची नोटीस पाठविण्यात आली. संपाच्या दिवशी बँकेच्या शाखा आणि कार्यालये सुरळीत चालण्यासाठी आवश्यक ती पावले उचलली जात असली तरी, प्रत्यक्षात संपाच्या दिवशी शाखा व कार्यालयांच्या कामकाजावर परिणाम होऊ शकतो.