निर्देशांकांचा नवा उच्चांक नोंदविला, पण दिवसअखेर जेमतेम वाढ

आठवडय़ातील दुसऱ्या सत्रात निर्देशांकांमध्ये किरकोळ वाढ राखत प्रमुख शेअर बाजारांनी नवा उच्चांक स्थापन केला. ३.४८ अंश वधारणेसह सेन्सेक्स २५,५८३.६९ पर्यंत तर निफ्टी १.८० अंश वाढीसह ७,६५६.४० वर बंद झाला.

आठवडय़ातील दुसऱ्या सत्रात निर्देशांकांमध्ये किरकोळ वाढ राखत प्रमुख शेअर बाजारांनी नवा उच्चांक स्थापन केला. ३.४८ अंश वधारणेसह सेन्सेक्स २५,५८३.६९ पर्यंत तर निफ्टी १.८० अंश वाढीसह ७,६५६.४० वर बंद झाला.
व्यवहारात सेन्सेक्स २५,७११.११ तर निफ्टी ७,६८३.२० पर्यंत गेले होते. सेन्सेक्समध्ये या चार व्यवहारात जवळपास ७८० अंशांची भर पडली आहे. असे करताना सलग तिसऱ्या दिवशी मुंबई निर्देशांकाने ऐतिहासिक टप्पा गाठण्याचा क्रम राखला आहे.
मंगळवारी शेअर बाजारात माहिती व तंत्रज्ञान तसेच औषधनिर्मिती कंपन्यांचे समभाग उंचावले. तर बांधकाम निर्देशांक सर्वाधिक ३ टक्क्यांनी घसरला. सेन्सेक्समधील निम्म्याहून अधिक समभाग घसरले. किरकोळ महागाई व औद्योगिक उत्पादनाची आकडेवारी जाहीर होण्यास काही कालावधी शिल्लक असतानाच कमी मान्सूनच्या भीतीने बाजाराने व्यवहारातील २५,३४७.३३ हा नीचांक नोंदविला.
रुपयात सलग घसरण
डॉलरच्या तुलनेत रुपया मंगळवारी पुन्हा घसरला. डॉलरच्या तुलनेत स्थानिक चलन ९ पैशांनी रोडावत ५९.२९ पर्यंत खाली आले. व्यवहारात सुरुवातीलाच ५८.९८ या दिवसाच्या उच्चांकावर असणारा रुपया अखेरच्या टप्प्यात ५९.२३ पर्यंत घसरला. आधीच्या दोन सत्रांत रुपया २१ पैशांनी भक्कम बनला होता. दरम्यान, मुंबईच्या सराफा बाजारात मंगळवारी संमिश्र वातावरण पाहायला मिळाले. स्टॅण्डर्ड सोने १० ग्रॅममागे ४० रुपयांनी वधारले. तर चांदीचा किलोचा भाव मात्र २५ रुपयांनी खाली आला. मौल्यवान धातूचे दर अनुक्रमे २६,७०० व ४१,०८५ रुपये राहिले.

Loksatta Telegram लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

मराठीतील सर्व अर्थसत्ता बातम्या वाचा. मराठी ताज्या बातम्या (Latest Marathi News) वाचण्यासाठी डाउनलोड करा लोकसत्ताचं Marathi News App. ताज्या बातम्या (latest News) फेसबुक , ट्विटरवरही वाचता येतील.

Web Title: Bse sensex ends flat after hitting new life time high infosys cipla shares gain

ताज्या बातम्या