षटकार शेअर बाजाराचा!

सलग दुसऱ्या दिवशी विक्रमावर स्वार होत भांडवली बाजार मंगळवारी नव्या उच्चांकाला पोहोचला. सहाव्या सत्रातही तेजी नोंदविताना मुंबई शेअर बाजाराचा सेन्सेक्स आठवडय़ातील दुसऱ्या व्यवहारात २६,५०० च्या पुढे गेला.

* मुंबई निर्देशांकाकडून २६,५०० चा तर निफ्टीद्वारे ७,९०० ला गवसणी
* सेन्सेक्सची सहा दिवसात एक हजार अंशांची भर
* विदेशी गुंतवणूकदारांची सोमवारची खरेदी ५०० कोटी
सलग दुसऱ्या दिवशी विक्रमावर स्वार होत भांडवली बाजार मंगळवारी नव्या उच्चांकाला पोहोचला. सहाव्या सत्रातही तेजी नोंदविताना मुंबई शेअर बाजाराचा सेन्सेक्स आठवडय़ातील दुसऱ्या व्यवहारात २६,५०० च्या पुढे गेला. तर राष्ट्रीय शेअर बाजाराच्या निफ्टीने ७,९०० चा स्तर तोडला. २९.७१ अंश वधारणेसह सेन्सेक्स २६,४२०.६७ वर गेला. तर २३.२५ अंशांची भर पडल्याने निफ्टी ७,८९७.५० पर्यंत पोहोचला. दोन्ही प्रमुख निर्देशांक एक टक्क्य़ांहून अधिक प्रमाणात उंचावले.
विकासाचा आराखडा नमूद करणाऱ्या पंतप्रधानांच्या भाषणाला पसंतीची प्रतिक्रिया देताना भांडवली बाजाराने सोमवारी आठवडय़ाच्या सुरुवातीलाच नव्या उच्चांकावर नेऊन ठेवले होते. सत्रातील निर्देशांकाची झेप वगळता असेच काहीसे चित्र बाजारात मंगळवारीदेखील उमटले.
मंगळवारच्या व्यवहारात सेन्सेक्स २६,५०० च्या पुढे जात २६,५३०.६७ पर्यंत झेप घेता झाला. तर सत्रात निफ्टीने बुधवारी ७,९०० चा टप्पा ओलांडला. व्यवहारअखेर निफ्टी ७,८९७.५० वर बंद झाला.
सलग सहा व्यवहारातील तेजीमुळे मुंबई निर्देशांकात १,०९० अंशांची भर पडली आहे. तर सोमवारी विदेशी संस्थागत गुंतवणूकदारांनी ४७३.४२ कोटी रुपयांचे समभाग खरेदी केले. तर स्थानिक संस्थागत गुंतवणूकदारांची खरेदी ४९०.०४ कोटी रुपयांची राहिली. मंगळवारी सेन्सेक्समधील ३० पैकी १९ समभाग वधारले. भेल, एनटीपीसी, कोल इंडिया, सेसा स्टरलाईट, डॉ. रेड्डीज्, अ‍ॅक्सिस बँकेच्या समभागांना मागणी राहिली. तर वाहन, बांधकाम, ऊर्जा, तेल व वायू, भांडवली वस्तू, सार्वजनिक उपक्रम, आरोग्यनिगा हे क्षेत्र आघाडीवर राहिले. क्षेत्रीय निर्देशांकांमध्ये २.२५ टक्क्य़ांसह वाहन निर्देशांक आघाडीवर राहिला.
रुपया उंचावला
भांडवली बाजारापाठोपाठ परकी चलन व्यवहारात रुपयाही मंगळवारी सलग दुसऱ्या सत्रात तेजाळला. डॉलरच्या तुलनेत स्थानिक चलन ९ पैशांनी भक्कम बनले. रुपया ६०.६७ वर स्थिरावला. व्यवहारात रुपया ६०.५५ पर्यंत उंचावला. रुपया आता गेल्या तीन आठवडय़ाच्या उंच्चांकावर पोहोचला आहे. ३१ जुलै रोजी चलन ६०.५५ वर होते. सोमवारीही रुपया ४५ पैशांनी उंचावला होता. गेल्या आठवडय़ातील सातत्याच्या आपटीमुळे चलन ६१ रुपयांपर्यंत घसरले होते.
कच्चे तेल दर स्थिरावले
आंतरराष्ट्रीय बाजारात कच्च्या तेलाचे दर गेल्या जवळपास दिड वर्षांच्या किमान पातळीवर स्थिरावले आहेत. प्रति पिंप तेल आता १०२ डॉलपर्यंत खाली आले आहेत. जुलै २०१३ मध्ये कच्चे तेल या समकक्ष होते. तर २०१४ च्या सुरुवातीलाही कच्च्या तेलाचा दर १०७ डॉलर प्रति िपप होता. तो यंदाच्या जूनमध्ये ११५ डॉलर प्रति पिंपपर्यंत पोहोचला होता. भारताला लागणाऱ्या एकूण तेलापैकी सुमारे ८० टक्के तेल आयात करावे लागते. कच्च्या तेलाच्या दरातील घसरण स्थानिक कंपन्यांचे नुकसान कमी करण्यास लाभदायी मानली जात आहे.

सार्वजनिक कंपन्यांना मागणी
आंतरराष्ट्रीय बाजारात कच्च्या तेलाचे दर कमालीने खाली येत असल्याचा परिणाम बाजारात सूचिबद्ध असलेल्या तेल व वायू विक्री तसेच विपणन क्षेत्रातील कंपन्यांचे समभाग मूल्य मंगळवारी वधारले. एकूणच सार्वजनिक क्षेत्रातील कंपन्यांच्या समभागांची भांडवली बाजाराच्या व्यासपीठावर मोठय़ा प्रमाणात खरेदी झाली. बीपीसीएल, एचपीसीएल, आयओसीसारख्या कंपन्याचे समभाग मूल्य ४ टक्क्य़ांपर्यंत उंचावले.
भारत पेट्रोलियम
रु. ६७४.१० (+३.९३%)
हिंदुस्थान पेट्रोलियम
रु. ४५१.१० (+२.३९%)
इंडियन ऑईल
रु. ३५८.२० (+१.६०%)

Loksatta Telegram लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

मराठीतील सर्व अर्थसत्ता बातम्या वाचा. मराठी ताज्या बातम्या (Latest Marathi News) वाचण्यासाठी डाउनलोड करा लोकसत्ताचं Marathi News App. ताज्या बातम्या (latest News) फेसबुक , ट्विटरवरही वाचता येतील.

Web Title: Bse sensex nse nifty break records as markets rise for 6th straight day

ताज्या बातम्या