मुंबई : अनियंत्रित महागाईला लगाम म्हणून अमेरिकी मध्यवर्ती बँक - फेडरल रिझव्र्हने बुधवारी व्याजदरात थेट पाऊण टक्क्यांची वाढ करण्याचा निर्णय जाहीर केला आणि परिणामी जगभरातील भांडवली बाजारात समभाग विक्रीचा चौफेर मारा सुरू झाला. देशांतर्गत भांडवली बाजारावर देखील त्याचे प्रतिकूल पडसाद उमटल्याने प्रमुख निर्देशांकांमध्ये सुमारे दोन टक्क्यांची पडझड झाली. दिवसअखेर मुंबई शेअर बाजाराचा निर्देशांक सेन्सेक्समध्ये १,०४५.६० अंशांची घसरण होत ५१,४९५.७९ पातळीवर बंद झाला. त्याने दिवसभरातील उच्चांकी पातळीपासून १७१७.०२ अंशांची गटांगळी खात ५१,४२५.४८ ही गत वर्षभरातील (५२ सप्ताहातील) नवीन नीचांकी पातळी गाठली. त्यापाठोपाठ राष्ट्रीय शेअर बाजाराचा निर्देशांक निफ्टीमध्ये ३३१.५५ अंशांची घसरण झाली आणि तो १५,३६०.६० पातळीवर स्थिरावला. निफ्टीने देखील १५,३३५.१० हा गत वर्षभरातील नवीन तळ गाठला. सध्या संपूर्ण जगाला भेडसावणाऱ्या महागाईच्या आजारावर मध्यवर्ती बँकांकडून फक्त आक्रमकपणे व्याजदरवाढीची मात्रा दिली जात आहे. मंदावणारी जागतिक अर्थव्यवस्था आणि त्यापरिणामी कंपन्यांच्या कमाईवर विपरीत परिणाम होत आहे. अमेरिकेत सध्या ग्राहकोपयोगी वस्तूंच्या विक्रीमध्ये मासिक आधारावर सतत घसरण होत आहे. देशांतर्गत पातळीवर परदेशी गुंतवणूकदारांकडून विक्रीचा मारा कायम असून उच्च मूल्यांकन असलेल्या माहिती तंत्रज्ञान आणि धातू क्षेत्रातील समभाग विक्रीच्या माऱ्यामुळे ही क्षेत्रे सर्वाधिक प्रभावित झाली आहेत. सेन्सेक्समध्ये टाटा स्टील, टेक मिहद्र, इंडसइंड बँक, विप्रो, भारती एअरटेल, बजाज फायनान्स, कोटक मिहद्र बँक आणि एनटीपीसीच्या समभागात सर्वाधिक घसरण झाली. दुसरीकडे नेस्ले इंडियाचा समभाग सकारात्मक पातळीवर व्यवहार करत स्थिरावला. १५.७४ लाख कोटींची मालमत्ता लयाला जगभरातील मध्यवर्ती बँकांकडून करण्यात येणारी व्याजदर कपात आणि परदेशी गुंतवणूकदारांचा देशांतर्गत बाजारातून काढता पाय यामुळे प्रमुख निर्देशांकात घसरण सुरू आहे. सेन्सेक्सने सलग पाच सत्रांत ३,८२४.४९ अंश गमावत ६.९१ टक्क्यांची आपटी खाल्ली आहे. यामुळे मुंबई शेअर बाजारातील सूचिबद्ध कंपन्यांचे बाजार भांडवलात १५,७४,९३१.५६ कोटींची घसरण होत ते २,३९,२०,६३१.६५ कोटींवर पोहोचले आहे. रुपया किंचित सावरला गुरुवारच्या सत्रात रुपया डॉलरच्या तुलनेत १२ पैशांनी सावरत ७८.१० पातळीवर स्थिरावला. बुधवारच्या सत्रात रुपयाने डॉलरपुढे नांगी टाकत ७८.२२ रुपयांच्या ऐतिहासिक नीचांकी पातळीला स्पर्श केला होता. परकीय चलन विनिमय मंचावर रुपयाने ७८.०६ रुपये प्रति डॉलर अशा सकारात्मक पातळीवर गुरुवारी व्यवहाराला सुरुवात केली होती. गुंतवणूकदारांनी काय करावे? वादळी अस्थिरतेच्या सध्याच्या परिस्थितीत गुंतवणूकदारांनी मूळ भांडवलाचे संरक्षण होईल अशा रणनीतीसह जोखीम व्यवस्थापनाला प्राधान्य द्यावे. म्हणजेच गुंतवणूकयोग्य रक्कम ही समभाग आणि समभागसंलग्न गुंतवणूक (इक्विटी), रोखे यात विभागून ठरावीक निधी रोखतेच्या स्वरूपात ठेवायला हवा. गुंतवणूकदारांनी महागाईची कमी झळ बसणाऱ्या वित्त आणि सेवा क्षेत्रावर लक्ष केंद्रित करायला हवे. शिवाय उपभोग, माहिती तंत्रज्ञान, औषधी निर्माण आणि दूरसंचार क्षेत्रातील समभागांचा दीर्घकालीन खरेदीसाठी विचार करायला हवा, असा मोलाचा सल्ला जिओजित फायनान्शियल सव्र्हिसेसचे संशोधन प्रमुख विनोद नायर यांनी गुंतवणूकदारांना दिला आहे.
