मुंबई : डॉलरच्या तुलनेत रुपयातील घसरण कायम असून रुपयाने बुधवारी नवीन नीचांक नोंदविला. प्रति डॉलर रुपया आणखी २७ पैशांनी घसरून रुपयाने ७८.४० हा अभूतपूर्व तळ गाठला.
आंतरबँक परकीय चलन बाजारात बुधवारच्या सत्रात रुपयाने ७८.१३ या पातळीपासून व्यवहारास सुरुवात केली. दिवसअखेरीस २७ पैशांची तूट दर्शवत रुपयाचे मूल्य प्रति डॉलर ७८.४० या सार्वकालिक नीचांकपदी जाऊन स्थिरावले.
रिझव्‍‌र्ह बँकेच्या उपाययोजना व बाजारातील हस्तक्षेपातून रुपया डॉलरच्या तुलनेत ७७.८० ते ७८.२० पातळी दरम्यान व्यवहार करण्याची शक्यता आहे. मात्र रुपयाने ही पातळी मोडल्यास रुपयामध्ये ३० ते ५० पैशांची घसरण होण्याची शक्यता आहे, असे मत सीआर फॉरेक्सचे अमित पाबारी यांनी व्यक्त केले.
घसरगुंडी कशामुळे?
* भांडवली बाजारात परदेशी संस्थात्मक गुंतवणूकदारांकडून अविरतपणे समभाग विक्रीचा मारा कायम आहे.
* त्यांच्याकडून गुंतवणूक माघारी नेताना वाढलेल्या डॉलरच्या मागणीचा रुपया मूल्यावर स्वाभाविक ताण येऊन तो अधिक कमजोर झाला.
* खनिज तेलाच्या आंतरराष्ट्रीय किमती काहीशा ओसरल्या असल्या तरी त्यातून रुपयातील घसरण रोखण्याच्या दृष्टीने त्याचा मर्यादित परिणाम दिसून आला.
