निर्देशांकाची चार महिन्यांतील सर्वात मोठी घसरगुंडी!

इराकमधील युद्धसदृश स्थितीमुळे आंतरराष्ट्रीय बाजारात कच्च्या तेलाच्या किमती नऊ महिन्यांच्या उच्चांकाला पोहोचलेल्या पाहून चिंतित गुंतवणूकदारांनी स्थानिक भांडवली बाजारात मोठय़ा घसरणीने क्षोभ व्यक्त केला.

इराकमधील युद्धसदृश स्थितीमुळे आंतरराष्ट्रीय बाजारात कच्च्या तेलाच्या किमती नऊ महिन्यांच्या उच्चांकाला पोहोचलेल्या पाहून चिंतित गुंतवणूकदारांनी स्थानिक भांडवली बाजारात मोठय़ा घसरणीने क्षोभ व्यक्त केला. सेन्सेक्ससह निफ्टीने एकाच व्यवहारातील गेल्या चार महिन्यांतील सर्वात मोठी आपटी नोंदविली. परिणामी, सेन्सेक्स ३४८.०४ अंश घसरणीसह थेट २५,२२८.१७  पर्यंत, तर शतकी घट (१०७.८० अंश) नोंदवून राष्ट्रीय शेअर बाजाराचा प्रमुख निर्देशांक निफ्टीदेखील ७,५४२.१० पर्यंत खाली आला. दोन्ही निर्देशांकांनी तब्बल दीड टक्क्यांच्या घरात घसरण राखली.
औद्योगिक उत्पादन व महागाई दराच्या दिलासादायी आकडय़ांच्या पाश्र्वभूमीवर रिझव्‍‌र्ह बँकेकडून व्याजदराबाबत सहानुभूती दाखविली जाईल या आशेवर भांडवली बाजारात गुरुवारी तेजीचे व्यवहार झाले होते. सेन्सेक्सने दिवसअखेर १०० हून अधिक अंशांची वाढ नोंदविली होती. बाजाराची सप्ताहअखेरच्या दिवसाची सुरुवातही तेजीसहच झाली. एप्रिलमधील वाढलेला औद्योगिक उत्पादन व मेमधील सावरलेला किरकोळ महागाई दर याचे स्वागत गुंतवणूकदारांनी निर्देशांकाला व्यवहारात २५,६८८.३१ पर्यंत नेऊन ठेवत केले. यानंतर मात्र आंतरराष्ट्रीय घडामोडींचा बाजारावर विपरित परिणाम दिसून आला.
इराकमधील युद्धसदृश स्थितीपोटी कच्च्या तेलाचे दर नऊ महिन्यांच्या उच्चांकाला जाऊन पोहोचताच बाजारात दबाव निर्माण झाला. यातून सेन्सेक्समधील तब्बल २६ समभागांचे मूल्य घसरणीत परावर्तित झाले, तर क्षेत्रीय निर्देशांकांमध्ये माहिती तंत्रज्ञान हा केवळ एक निर्देशांक वगळता, उर्वरित सर्व ११ क्षेत्रीय निर्देशांक घसरणीत राहिले. समभागांमध्ये अ‍ॅक्सिस बँक, टाटा स्टील, हीरो मोटोकॉर्प हे नुकसानीकरिता आघाडीवर राहिले. क्षेत्रीय निर्देशांकांमध्ये सर्वाधिक फटका बांधकाम क्षेत्राला तब्बल ५.२४ टक्क्यांच्या घसरणीच्या रूपात बसला.
सत्रात सेन्सेक्स २५,१७१.६१ पर्यंत नीचांकाला आला होता, तर व्यवहारात ७,६७८.५० पर्यंत झेपावणारा निफ्टीदेखील सत्रात ७,५२५.३५ पर्यंत खाली आला. दिवसअखेर त्यात शतकी आपटी नोंदली गेली. इराकमुळे तेल दरांबरोबरच भारतीय चलनातही शुक्रवारी मोठी हालचाल नोंदविली गेली. शिवाय बाजारातील सूचिबद्ध तेल विपणन व विक्री कंपन्यांचे समभाग मूल्यदेखील अस्थिर झाले. तेल व वायू क्षेत्रातील केवळ पेट्रोनेट एलएनजी वगळता इतर सर्व नकारात्मक यादीत राहिले.
एकाच व्यवहारातील तब्बल १.३६ टक्के घसरणीने सेन्सेक्सने सत्रात गेल्या चार महिन्यांतील सर्वात मोठी घसरण नोंदविली. मुंबई निर्देशांकाने यापूर्वी २७ जानेवारी रोजी ४२६.११ अंश घट राखली होती. त्या वेळी बाजारावर रिझव्‍‌र्ह बँक तसेच अमेरिकन फेडरल बँकेच्या नियोजित बैठकांचे सावट होते.

रुपया ५२ पैशांनी आपटला
मुंबई : आंतरराष्ट्रीय बाजारात कच्च्या तेलाच्या दरांचा भडका उडाला असतानाच डॉलरच्या तुलनेत भारतीय चलन शुक्रवारी एकाच व्यवहारात एकदम ५१ पैशांनी आपटले. गेल्या चार महिन्यांतील सर्वात मोठय़ा आपटीसह रुपया ५९.७७ पर्यंत घसरला. यापूर्वी २४ जानेवारी रोजी रुपया एकाच व्यवहारात तब्बल ७३ पैशांनी घसरला होता. सलग तिसऱ्या सप्ताहातील घसरणीची कामगिरी बजावणारा रुपया ६ जूनपासून ६० पैशांनी घसरला आहे. सप्ताहअखेरच्या सत्राची सुरुवात ५९.३१ अशा नरमाईने करत चलनाने शुक्रवारी व्यवहारात ५९.८० पर्यंत तळ गाठला.

सोने-चांदी दरांना लकाकी!
मुंबई : कच्च्या तेल दरातील वाढ आणि परिणामी कमकुवत बनलेल्या रुपया, या परिणामी सराफा बाजारात मौल्यवान धातूंच्या दरांची झेप शुक्रवारी दिसून आली. सोन्याचा भाव तोळ्यामागे एकदम ३५० रुपयांनी वाढत २७ हजार रुपयांच्या पल्याड गेला. गेल्या काही सत्रांपासून मौल्यवान धातू २७ हजारांच्या आत स्थिरावला होता. तर शुक्रवारी चांदीच्या दरातही एकाच दिवसात किलोसाठी थेट ८३० रुपयांची वाढ नोंदली गेली. परिणामी, पांढऱ्या धातूचा भाव याच वजनासाठी ४२ हजार रुपयांच्या पुढे जात ४२,४३५ रुपयांवर गेला.

Loksatta Telegram लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

मराठीतील सर्व अर्थसत्ता बातम्या वाचा. मराठी ताज्या बातम्या (Latest Marathi News) वाचण्यासाठी डाउनलोड करा लोकसत्ताचं Marathi News App. ताज्या बातम्या (latest News) फेसबुक , ट्विटरवरही वाचता येतील.

Web Title: Sensex tanks 348 pts logs biggest single day drop in over 4 months on iraq tensions

ताज्या बातम्या