नवी दिल्ली : टाटा समूहातील धातू कंपन्यांचे टाटा स्टीलमध्ये महाविलीनीकरणाच्या प्रस्तावाला कंपनीच्या संचालक मंडळाने मंजुरी दिल्याचे शुक्रवारी स्पष्ट केले. प्रस्तावानुसार, समूहातील सात धातू व्यवसायातील उपकंपन्यांचे टाटा स्टीलमध्ये विलीनीकरण होणार आहे. टाटा समूहातील टाटा मेटॅलिक्स, टाटा टिनप्लेट, टाटा स्टील लाँग प्रॉडक्ट्स, टीआरएफ लिमिटेड या भांडवली बाजारात सूचिबद्ध चार कंपन्यांचा विलीनीकरणात समावेश आहे. इंडियन स्टील अँड वायर प्रॉडक्ट्स, टाटा स्टील मायिनग लिमिटेड आणि एस अँड टी मायिनग कंपनी या तीन सूचिबद्ध नसलेल्या कंपन्यांचे देखील विलीनीकरण करण्यात येईल. या सर्व कंपन्या टाटा स्टीलच्या साहाय्यक कंपन्या असून टाटा स्टील लाँग प्रॉडक्ट्स लिमिटेडमध्ये ७४.९१ टक्के, टिनप्लेट ७४.९६ टक्के, टाटा मेटॅलिक्स ६०.०३ टक्के, इंडियन स्टील अँड वायर प्रॉडक्ट्स लिमिटेडमध्ये ९५.०१ टक्के आणि टीआरएफ लिमिटेडमध्ये तिची ३४.११ टक्के हिस्सेदारी आहे. तर टाटा स्टील मायिनग लिमिटेड आणि एस अँड टी मायिनग कंपनी लिमिटेड या टाटा स्टीलच्या पूर्ण मालकीच्या उपकंपन्या आहेत. विलीनीकरण होत असलेल्या सर्व कंपन्यांच्या संचालक मंडळांनी देखील प्रस्तावावर सकारात्मक विचार करत विलीनीकरणास एकमताने मान्यता दिली आहे. प्रस्तावित विलीनीकरणाचा उद्देश हा समन्वय वाढवणे, समूह आणि व्यवस्थापन संरचना सुलभ करणे, अभियांत्रिकी क्षमता वाढवणे आणि धोरणात्मकदृष्टय़ा व्यवसायांचे एकत्रीकरणाचा असल्याचे टाटा स्टीलकडून सांगण्यात आले. एकत्रीकरणामुळे वाहतूक आणि माल हाताळणी (लॉजिस्टिक), खरेदी धोरण आणि विस्तार योजनांसाठी सर्व प्रकल्पांमध्ये योग्य समन्वय साधता येणार आहे. शिवाय भविष्यात खर्च कमी होऊन कंपनीची कार्यक्षमता वाढण्यास मदत होईल. भागधारकांना काय मिळणार? टाटा मेटॅलिक्सच्या १० समभागांच्या बदल्यात विलीनीकरणानंतर टाटा स्टीलचे ७९ समभाग मिळतील. टिनप्लेटच्या भागधारकांना त्यांच्याकडील १० समभागांच्या बदल्यात टाटा स्टीलचे ३३ समभाग मिळतील. टाटा स्टील लाँग प्रॉडक्ट्सच्या १० समभागांच्या बदल्यात टाटा स्टीलचे ६७ समभाग मिळतील. तर टीआरएफच्या भागधारकांना १० समभागांच्या बदल्यात टाटा स्टीलचे १७ समभाग मिळतील.
