24 September 2020

News Flash

कर बोध : अग्रिम कराचा दुसरा हप्ता १५ सप्टेंबरपूर्वी

अग्रिम कर ऑनलाइन किंवा बँकेत चलन देऊन भरता येतो,

प्रवीण देशपांडे

आर्थिक वर्ष २०२०-२१चा (कर निर्धारण वर्ष २०२१-२२) अग्रिम कराचा दुसरा हप्ता भरण्याची शेवटची तारीख १५ सप्टेंबर २०२० ही आहे.

> अग्रिम कर कोणी भरावयाचा आहे : ज्या करदात्यांचे अंदाजित करदायित्व १०,००० रुपयांपेक्षा जास्त असेल अशांना अग्रिम कराच्या तरतुदी लागू होतात. ज्या करदात्याच्या उत्पन्नातून उद्गम कर (टीडीएस) कापला जातो अशा करदात्यांना अग्रिम कराच्या तरतुदीसाठी अंदाजित करदायित्व गणतांना उत्पन्नावरील उद्गम कर वजा केल्यानंतर देय कर १०,००० रुपयांपेक्षा जास्त असेल तर अग्रिम कर भरावा लागतो.

> अग्रिम कराचा दुसरा हप्ता कोणाला भरावयाचा नाही : (१) निवासी ज्येष्ठ नागरिक, ज्यांच्या उत्पन्नात धंदा-व्यवसायाच्या उत्पन्नाचा समावेश नाही, अशांना अग्रिम कराच्या तरतुदी लागू होत नाहीत. (२) करदाता अनुमानित कराच्या योजनेचा लाभ घेणार असेल, म्हणजेच कलम ४४एडी किंवा ४४ एडीएनुसार अनुमानित कर भरण्यासाठी पात्र असेल आणि या कलमांतर्गत कर भरत असेल तर अशा करदात्यांना १०० टक्के देय कर १५ मार्च २०२१ पूर्वी भरावा लागेल.

> अग्रिम कर कसा गणावा आणि किती भरावा : करदात्याने २०२०-२१ या आर्थिक वर्षांतील अंदाजित उत्पन्नाचा आढावा घेऊन, त्या उत्पन्नातून प्राप्तिकर कायद्याप्रमाणे मिळणाऱ्या वजावटी (गृहकर्ज, कलम ८० सी वगैरे) विचारात घेऊन बाकी उत्पन्नावर एकूण किती कर भरावा लागेल याची गणना करावी किंवा करदाता नवीन करप्रणालीनुसार (वजावट आणि सवलती न घेता सवलतीच्या दरात कर) कर भरणार असेल तर त्यानुसार देय कर गणावा. या रकमेतून उद्गम कर आणी टीसीएस वजा करावा आणि बाकी कर हा अग्रिम कराच्या रूपाने भरावा.

अग्रिम कराचा पहिला हप्ता या एकूण अंदाजित कराच्या (उद्गम कर वजा जाता) १५ टक्के इतका १५ जूनपूर्वी भरला असेलच. आता या दुसऱ्या हप्त्यात अंदाजित कराच्या एकूण ४५ टक्के इतका कर भरला गेला पाहिजे आणि हा हप्ता १५ सप्टेंबरपूर्वी भरावा लागेल. करदात्याला नियमित उत्पन्नाव्यतिरिक्त काही उत्पन्न अग्रिम कराचा हा हफ्ता भरल्यानंतर मिळाले असेल, (उदा. भांडवली नफा, करपात्र भेट, वगैरे) तर असे उत्पन्न अग्रिम कराचा पुढील हप्ता भरताना विचारात घ्यावे.

> अग्रिम कर कसा भरावा : अग्रिम कर ऑनलाइन किंवा बँकेत चलन देऊन भरता येतो, यासाठी २८० क्रमांकाचे चलन वापरून अग्रिम कर भरता येतो.

> अग्रिम कर न भरल्यास, कमी किंवा उशिरा भरल्यास : अग्रिम कर न भरल्यास, कमी भरल्यास किंवा मुदतीनंतर भरल्यास व्याज भरावे लागते.

> अग्रिम कर जास्त भरल्यास : अग्रिम कर जास्त भरल्यास विवरणपत्र भरून कर परताव्याचा (रिफंड) दावा करता येतो.

प्राप्तिकर खात्याने करोनाच्या प्रादुर्भावामुळे उद्भवलेल्या परिस्थितीतही, अग्रिम कराच्या तरतुदींच्या अनुपालनाच्या मुदतीत वाढ केलेली नाही.

लेखक सनदी लेखापाल व कर सल्लागार

pravin3966@rediffmail.com

लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

First Published on September 14, 2020 1:25 am

Web Title: income tax information second installment of advance tax before 15th september zws 70
Next Stories
1 बाजाराचा तंत्र कल : दिस जातील,  दिस येतील!
2 माझा पोर्टफोलियो : अर्थव्यवस्थेच्या करोनापश्चात उभारीची शिलेदार
3 बाजाराचा तंत्र कल : दे धक्का
Just Now!
X