Devendra Fadnavis Astrology: महाराष्ट्राच्या राजकारणात सतत होणारी उलथापालथ पाहता नक्की कोणाचे ग्रह मजबूत आहेत आणि कोणाची शक्ती कमी पडतेय अशा चर्चा सामन्यांमध्ये रंगत आहेत. अलीकडेच पुण्यातील कसबा पोटनिवडणुकीत भाजपच्या उमेदवाराचा पराभव झाल्याने भाजपचे राज्यातील स्थान दुबळे होत आहे का? राज्यात २०२४ मध्ये पुन्हा सत्ता बदल होणार का? असेही प्रश्न समोर आहेत. अशातच भाजप नेत्यांच्या विधानांवरून महाराष्ट्र भाजपामध्ये मोठे फेरबदल होणार असल्याचं स्पष्ट झालं आहे. भाजपचे महाराष्ट्रातील प्रमुख नेते म्हणजेच उपमुख्यमंत्री देवेंद्र फडणवीस यांच्या ग्रहांची स्थिती पाहता २०२४ मध्ये फडणवीसांवर महाराष्ट्रापेक्षा मोठी जबाबदारी दिल्लीतून सोपवण्याची शक्यता आहे. प्रसिद्ध ज्योतिषतज्ञ जयंती अलुरकर यांनी फडणवीसांच्या कुंडलीचा अभ्यास करून २०२४ साठी मोठी व महत्त्वाची भविष्यवाणी केली आहे.
देवेंद्र फडणवीस आणि २०२४..
२०२३ या वर्षात महाराष्ट्रात परदेशी गुंतवणूक वाढावी, व तरुण वर्गाची नोकरी व व्यवसायात भरभराट व्हावी ह्यासाठी देवेंद्र फडणवीस विशेष प्रयत्न करताना दिसतील. तसेच महिलांचे सबलीकरण आणि सशक्तीकरण करण्यात त्यांचा मोलाचा वाटा असेल. त्यांच्या या प्रयत्नांना यश आल्यास २०२४ मधील निवडणुकीत भाजपला देवेंद्र फडणवीस यांच्या जनमानसातील ‘प्रतिमेवर’ व काही अंशी युतीमुळे भरघोस यश लाभू शकते.
२०२४ मध्ये भाजप जिंकल्यास फडणवीसांना दिल्लीत काय मिळणार?
२०२३-२४ दरम्यान फडणवीस यांच्या महाराष्ट्रातील कामगिरीवर व त्यांची पक्षावरची निष्ठा व समर्पण ह्यांमुळे पक्षश्रेष्ठींकडून त्यांचे विशेष कौतुक होईल. महाराष्ट्राच्या प्रगतीसाठी पक्ष त्यांच्या मागे भक्कमपणे उभा राहताना दिसत आहे. यंदा येणाऱ्या अडचणी फडणवीस सांघिक प्रयत्नातून सहजच लीलया पेलतील. पक्षकार्यकर्त्यांपासून पक्षश्रेष्ठींपर्यंत, तसेच सर्व प्रकारच्या विरोधकांशी त्यांचे सामंजस्यपूर्ण संबंध हीच त्यांच्या यशाची गुरुकिल्ली आहे असे दिसते आहे. याच कौतुकातून फडणवीसांवर दिल्लीत मोठी जबाबदारी सोपवण्याचा विचार होऊ शकतो.
हे ही वाचा<< “देवेंद्र फडणवीसांवर मित्रांकडूनच चिखलफेक…” ज्योतिषतज्ज्ञांची मोठी भविष्यवाणी, म्हणतात, “पक्षातच शत्रू…”
दरम्यान, जयंती अलुरकर यांचा अभ्यास सांगतो की, टॅरोच्या चित्ररूपी आरश्यात फडणवीसांचा चेहरा कधी धीर गंभीर, तर कधी अगदी मिश्किल दिसत आहे. भावनाप्रधानता ते वास्तवाचे परिपूर्ण भान ठेवताना स्वतः संयत वृत्तीची वेळोवेळी ते प्रचिती करून देत असतात. लोकभावना आणि उद्दिष्टांची पूर्ती ह्यांची सुयोग्य सांगड घालताना राजकारणात सुवर्णमध्य गाठण्याचा प्रयत्न ते या वर्षात करतील.
