हर हर महादेव! ‘या’ दिवशी उघडणार केदारनाथ मंदिराचे दरवाजे; यावर्षी १० दिवस आधी सुरू होईल यात्रा…

केदारनाथ धामला जाणाऱ्या भाविकांसाठी एक आनंदाची बातमी आहे. बऱ्याच प्रतीक्षेनंतर, केदारनाथ धामचे दरवाजे उघडण्याची तारीख जाहीर करण्यात आली आहे. यानंतर अधिकृतपणे चार धाम यात्रेला सुरुवात होईल, त्यानंतर भारत आणि परदेशातून लाखो भाविक बाबा केदारच्या दर्शनासाठी येतील. केदारनाथ धामचे दरवाजे उघडण्याची तारीख हिवाळी आश्रयस्थान असलेल्या उखीमठ येथील ओंकारेश्वर मंदिरात जाहीर करण्यात आली. हिवाळ्यात, जेव्हा केदारनाथ धाम बर्फाने झाकलेले असते, तेव्हा येथे बाबांची पूजा केली जाते. यावेळी, टी. गंगाधर लिंग यांना केदारनाथ धामचे मुख्य पुजारी म्हणून नियुक्त करण्यात आले आहे, जे दरवाजे उघडल्यानंतर पूजेची जबाबदारी स्वीकारतील.

केदारनाथ धामचे दरवाजे कधी उघडणार?

बारा ज्योतिर्लिंगांपैकी एक असलेल्या पवित्र केदारनाथ मंदिराचे दरवाजे २२ एप्रिल २०२६ रोजी भाविकांसाठी उघडतील. बाबा केदारनाथ यांचे दर्शन सकाळी ८ वाजता सर्व विधींसह सुरू होतील.

केदारनाथ ज्योतिर्लिंग हे विशेष का आहे?

येथील ज्योतिर्लिंगाला भगवान शिवांच्या पृष्ठभागाचे (पाठीच्या भागाचे) प्रतीक मानले जाते. नेपाळमधील प्रसिद्ध पशुपतिनाथ मंदिरात शरीराचा अग्रभाग (समोरचा भाग) पूजला जातो. त्यामुळे या मंदिराचे धार्मिक महत्त्व आणखी वाढते. पौराणिक कथेनुसार, केदारनाथ मंदिर पांडवांनी शोधले होते. महाभारत युद्धानंतर, पांडव त्यांच्या पापांची मुक्तता मिळविण्यासाठी भगवान शिवाच्या शोधात निघाले. त्यांच्यामुळे क्रोधित होऊन भगवान शिव येथे बैलाच्या रूप धारण केले. नंतर, आदि गुरु आदि शंकराचार्य यांनी या मंदिराचा जीर्णोद्धार केला अशी मान्यता आहे.

सहा महिने बंद असतं मंदिर

चार धामांपैकी एक असलेले केदारनाथ मंदिर वर्षातून फक्त सहा महिने उघडे राहते. मुसळधार बर्फवृष्टी आणि अति थंडीमुळे दिवाळीनंतर दरवाजे बंद केले जातात. हिवाळ्यात, संपूर्ण परिसर बर्फाच्या जाड चादरीने झाकलेला असतो, ज्यामुळे तीर्थयात्रा अशक्य होते. एक विशेष परंपरा म्हणून, दरवाजे बंद झाल्यावर मंदिराच्या आत एक शाश्वत दिवा लावला जातो. असे मानले जाते की, हा दिवा संपूर्ण सहा महिने जळत राहतो.

बद्रीनाथ धामचे दरवाजे कधी उघडतील?

केदारनाथसह बद्रीनाथ मंदिराला चार धाम यात्रेत विशेष महत्त्व आहे. बद्रीनाथ धामचे दरवाजे २३ एप्रिल २०२६ रोजी ब्रह्म मुहूर्तावर सकाळी ६ वाजून १५ वाजता उघडतील. त्यापूर्वी, ७ एप्रिल २०२६ रोजी गडू घडा यात्रा सुरू होईल. या यात्रेद्वारे, पारंपारिकपणे भगवान बद्रीनाथ यांच्या अभिषेकासाठी तिळाचे तेल आणले जाते.

अक्षय तृतीयेला गंगोत्री आणि यमुनोत्री उघडणार

दरवर्षी अक्षय तृतीयेच्या शुभ मुहूर्तावर चार धाम यात्रा सुरू होते. यावर्षी, गंगोत्री आणि यमुनोत्री मंदिरांचे दरवाजे १९ एप्रिल २०२६ रोजी अक्षय तृतीयेला उघडतील. या दोन्ही मंदिरांच्या उघडण्याबरोबरच, चार धाम यात्रा अधिकृतपणे सुरू होईल.

यावर्षी केदारनाथ यात्रा मागील वर्षाच्या तुलनेत लवकर सुरू होत आहे. २०२५ मध्ये धामचे दरवाजे २ मे रोजी उघडले होते, तर यावेळी २२ एप्रिल रोजी उघडतील. म्हणजेच, भाविकांना यावेळी १० दिवस आधी दर्शन घेता येईल.