पुढचे २ महिने केतू करणार सळो की पळो! ३ ऑक्टोबरपासून वृषभ, कर्क, मकरसह ‘या’ राशींच्या लोकांना ताकही फुंकून प्यावे लागणार? पैसा अचानक जाणार

केतूचा मघा नक्षत्रातील बदल

वैदिक ज्योतिषात केतूला वैराग्य, अध्यात्म, गूढता, अलिप्तता आणि अचानक बदलांशी जोडले जाते. मघा नक्षत्राचा संबंध पितर, पूर्वज, परंपरा, प्रतिष्ठा आणि अधिकाराशी जोडला जातो. विशेष म्हणजे या नक्षत्राचा स्वामीही केतूच मानला जातो. ३ ऑक्टोबरला प्रथम चरणात प्रवेश करताना मेष नवांशाचा प्रभाव असल्याचे ज्योतिषीय गणितात मानले जाते. त्यामुळे काही व्यक्तींमध्ये निर्णय घेताना घाई किंवा प्रतिक्रियात्मक स्वभाव वाढण्याची शक्यता असल्याचे ज्योतिषीय मत आहे.

वृषभ

घर, कुटुंब आणि मालमत्तेशी संबंधित बाबींमध्ये काही अडथळे किंवा संभ्रम निर्माण होण्याची शक्यता आहे. मालमत्ता किंवा वाहनाशी संबंधित जुने विषय पुन्हा समोर येऊ शकतात. घर बदलणे किंवा मालमत्तेशी संबंधित मोठा आर्थिक निर्णय घेताना घाई टाळणे हिताचे ठरू शकते.

कर्क

पैशांची बचत आणि कौटुंबिक आर्थिक नियोजनावर परिणाम होण्याची शक्यता आहे. अचानक खर्च वाढू शकतो किंवा आर्थिक नियोजन बिघडू शकते, अशी ज्योतिषीय शक्यता वर्तवली जाते. रागाच्या भरात बोललेले शब्द कुटुंबातील वातावरण बिघडवू शकतात. त्यामुळे आर्थिक व्यवहार करताना आणि बोलताना विशेष सावधगिरी बाळगणे योग्य ठरू शकते.

सिंह

व्यक्तिमत्त्व, आत्मविश्वास आणि भविष्यातील निर्णयांबाबत संभ्रम निर्माण होण्याची शक्यता आहे. एखाद्या कामात सुरुवातीला उत्साह दाखवला जाऊन, नंतर त्यापासून दूर जाण्याची इच्छा होऊ शकते. नात्यांमध्ये अतिअलिप्तपणा निर्माण झाल्यास गैरसमज वाढण्याची शक्यता असल्याने संवाद महत्त्वाचा ठरू शकतो.

कन्या

खर्चाच्या बाबतीत अधिक काळजी घेण्याची गरज भासू शकते. अनावश्यक ठिकाणी पैसे खर्च होण्याची किंवा आर्थिक निर्णयामुळे अपेक्षित फायदा न मिळण्याची शक्यता ज्योतिषीय मान्यतेनुसार व्यक्त केली जाते. परदेश किंवा दूरच्या ठिकाणाशी संबंधित कामांमध्ये निर्णय घेण्यापूर्वी कागदपत्रे आणि इतर बाबी तपासून पाहणे योग्य ठरू शकते.

मकर

अचानक आर्थिक बदल किंवा अनपेक्षित खर्चाचा सामना करावा लागू शकतो, अशी शक्यता आहे. विमा, कर, वारसा, संयुक्त मालमत्ता किंवा भागीदारीतील पैशांशी संबंधित कागदपत्रांकडे दुर्लक्ष केल्यास अडचणी निर्माण होऊ शकतात. त्यामुळे कोणताही आर्थिक निर्णय पूर्ण माहिती घेतल्यानंतरच घेणे योग्य ठरेल.

कुंभ

नातेसंबंध आणि व्यावसायिक भागीदारीमध्ये मतभेद निर्माण होण्याची शक्यता आहे. जोडीदारासोबत संवाद कमी झाल्यास गैरसमज वाढू शकतात. नवीन व्यावसायिक भागीदारी करताना समोरच्या व्यक्तीची आणि व्यवहाराची पुरेशी माहिती तपासणे आर्थिक अडचणी टाळण्यासाठी उपयुक्त ठरू शकते.

केतूचा प्रभाव कधीपर्यंत?

ज्योतिषीय गणनेनुसार, केतूचा मघा नक्षत्रातील प्रवास डिसेंबर २०२६च्या सुरुवातीपर्यंत राहण्याची शक्यता आहे. या काळात केतू नक्षत्राच्या वेगवेगळ्या चरणांतून प्रवास करतील. त्यामुळे ज्योतिषीय गणनेनुसार त्याचे परिणामही टप्प्यानुसार वेगवेगळे मानले जातात.

(टीप : वरील माहिती ज्योतिषीय मान्यता आणि उपलब्ध गणनांवर आधारित आहे. त्यातील कोणताही परिणाम निश्चित भविष्यवाणी नसून, केवळ ज्योतिषीय शक्यता म्हणून लक्षात घ्यावा. आर्थिक, करिअर यांच्याशी निगडित किंवा वैयक्तिक इतर निर्णय घेताना प्रत्यक्ष परिस्थिती आणि तज्ज्ञांचा सल्ला विचारात घ्यावा.)