‘चोर तो चोर वर शिरजोर’! ‘या’ मूलांकाचे लोक चूक केली तर माघार घेत नाहीत; आत्मविश्वास तर भरपूर, पण हट्टी स्वभाव ठरतो वादाचे कारण

कोणता असतो मूलांक ४?

अंकशास्त्रानुसार ज्या व्यक्तींचा जन्म कोणत्याही महिन्याच्या ४, १३, २२ किंवा ३१ तारखेला झाला आहे, त्यांचा मूलांक ४ मानला जातो. अंकशास्त्रात या मूलांकाचा संबंध राहूशी जोडला जातो. राहूच्या प्रभावामुळे या व्यक्तींमध्ये नेहमीच्या चौकटीपेक्षा काहीतरी वेगळे करण्याची इच्छा, हुशारीने परिस्थिती हाताळण्याची क्षमता आणि स्वतःचा वेगळा मार्ग निवडण्याची प्रवृत्ती असल्याचे मानले जाते.

माझंच बरोबर असा हट्ट?

मूलांक ४ असलेल्या व्यक्तींबाबत असे म्हटले जाते की, एखादा निर्णय घेतल्यानंतर त्या निर्णयावर त्या ठाम राहतात. त्यांना आपली बाजू योग्य वाटत असेल, तर समोरची व्यक्ती कितीही समजावून सांगत असली तरी लगेच माघार घेणे त्यांना पसंत नसते. यामुळे काही वेळा त्यांचा आत्मविश्वास हट्टीपणा किंवा घमंडीपणा वाटू शकतो. विशेष म्हणजे, एखादा निर्णय चुकीचा ठरला तरी तो लगेच स्वीकारणे त्यांच्यासाठी कठीण असल्याचे अंकशास्त्रात सांगितले जाते.

हटके विचार, मोठा आत्मविश्वास!

मूलांक ४ असलेल्या व्यक्तींना नेहमीच्या मार्गाने जाण्यापेक्षा काहीतरी वेगळे करून पाहण्याची इच्छा असते असे मानले जाते. त्यामुळे त्या जोखीम घेण्यासही मागेपुढे पाहत नाहीत.

याच गुणाचा फायदा योग्य वेळी होऊ शकतो. मात्र, अति आत्मविश्वासामुळे घेतलेला चुकीचा निर्णय उलटाही परिणाम करू शकतो. त्यामुळे आपल्या मतावर ठाम राहतानाच परिस्थितीनुसार बदल स्वीकारणे आणि गरज पडल्यास स्वतःची चूक मान्य करणे महत्त्वाचे ठरते.