शहरातील शासकीय अभियांत्रिकी महाविद्यालयाच्या बाजूला अंधारात लपून दरोडा टाकण्याच्या तयारीत असणाऱ्या चौघा जणांना पोलिसांनी अटक केली. अंधाराचा फायदा घेऊन दोघे जण पळून जाण्यात यशस्वी झाले. अटक केलेल्या व्यक्तींकडून चाकू, पितळी धातूचे फायटर, मोबाइल, लोखंडी गज, नायलॉन दोरी, तिखट जप्त करण्यात आले. शासकीय अभियांत्रिकीच्या बाजूला काही जण अंधारात लपून बसले असल्याची माहिती पोलीस उपनिरीक्षक अमित बागूल यांना मिळाली. रात्री एक वाजता कर्मचाऱ्यांसह चारही बाजूने प्रकाश टाकला व दरोडेखोरांना पकडले. सरवर शहा मनोहर शहा (वय ३७, रा. रहमानिया कॉलनी), मनोज ऊर्फ जनार्दन मोरे (वय २५, रा. ब्रिजवाडी), देवा सुभाष चंद्रशेखर (वय २३, रा. शाहूनगर, केडगाव, अहमदनगर), रवि रमेश गायकवाड (वय २७, रा. ब्रिजवाडी) या चौघांना अटक करण्यात आली. अंधाराचा फायदा घेऊन पळून गेलेल्या दोघा जणांची नावे पोलिसांना समजली असून, कलीम खान व गुरमुख या दोघांनाही लवकरच अटक केली जाईल, असे पोलिसांनी सांगितले.
