14 July 2020

News Flash

अभूतपूर्व रॅली काढून शिवरायांना अभिवादन

छत्रपती शिवाजीमहाराज जयंतीनिमित्त शिवभक्तांच्या वतीने शहरात अभूतपूर्व दुचाकी रॅली काढून शिवरायांना अभिवादन केले.

छत्रपती शिवाजीमहाराज जयंतीनिमित्त शिवभक्तांच्या वतीने शहरात अभूतपूर्व दुचाकी रॅली काढून शिवरायांना अभिवादन केले.
गेल्या दोन दिवसांपासून संपूर्ण शहर भगव्या झेंडय़ांनी सजवण्यात आले. सिद्धेश्वर देवस्थानच्या आवारातून सकाळी साडेदहा वाजता दुचाकी रॅलीस प्रारंभ झाला. सिद्धेश्वर मंदिर ते अहल्यादेवी होळकर चौक, अंबाजोगाई रस्त्यावरून शिवाजी चौक, राजीव गांधी चौक, बसवेश्वर चौक, विवेकानंद चौक, शाहू चौक, गांधी चौक ते शिवाजी चौक या मार्गावर रॅली काढण्यात आली. रॅलीत सुमारे ४० हजार दुचाकीस्वार सहभागी झाल्याचा अंदाज व्यक्त करण्यात आला. शहरातील विविध चौक सजवण्यात आले होते. गणेशोत्सवाच्या वेळचे वातावरण शिवजन्मोत्सवानिमित्त तयार झाले होते. रस्त्याच्या दुतर्फा नागरिक मिरवणूक बघण्यास उभे होते. उड्डाणपुलावर तरुणांचा मोठा जथ्था मिरवणुकीवर पुष्पवृष्टी करीत होता. चौकाचौकात पिण्याचे पाऊच वितरित केले जात होते. शिवाजी चौक भव्यतेने सजवला होता. मुख्य मिरवणूक निघण्यापूर्वी मिरवणूक मार्गावर ऑटोरिक्षा रॅली काढून वातावरणनिर्मिती करण्यात आली. सुमारे शंभर महिला दुचाकी घेऊन सहभागी झाल्या होत्या. डोक्याला भगवे फेटे, तर काही तरुणांनी भगवे कपडे परिधान केले होते.
उदगीर, अहमदपूर, चाकूर, निलंगा, औसा, रेणापूर, मुरूड, औराद शहाजनी, कासारशिरसी आदी ठिकाणीही शिवजयंती साजरी करण्यात आली. शहरात मुस्लीम समाजाच्या पुढाकाराने स्वतंत्र रॅली काढण्यात आली. गंजगोलाईपासून शिवाजी चौकापर्यंत ताजोद्दीनबाबा, मोहन माने आदी मंडळींनी ही मिरवणूक काढण्यात पुढाकार घेतला.
पानगावात पोलीस चौकीवर दगडफेक
रेणापूर तालुक्यातील पानगाव येथे गुरुवारी भगवे झेंडे लावले होते. काही ठिकाणचे झेंडे रात्रीतून पोलिसांनी काढले, असा समज करून घेत शुक्रवारी सकाळी जमावाने पोलीस चौकीवर हल्ला करून दगडफेक केली. जमावाचा रुद्रावतार पाहून एक पोलीस पळून गेला, तर दुसऱ्या पोलिसाला जमावाने बेदम मारहाण करीत त्याच्या हातात झेंडे देऊन ज्या ठिकाणी झेंडे काढले होते त्या ठिकाणी लावण्यास भाग पाडले. त्याला जमावाने मिरवणूक काढावी त्या पद्धतीने रस्त्यावरून नेले. याची माहिती मिळताच रेणापूरचे तहसीलदार व उपविभागीय पोलीस अधिकाऱ्यांनी गावास भेट दिली. सध्या गावात शांतता असून जखमी पोलिसावर रुग्णालयात उपचार सुरू आहेत.

लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

First Published on February 20, 2016 1:20 am

Web Title: salutation of shivaji maharaj birth anniversary in rally
Next Stories
1 ‘शेतक ऱ्यांच्या मदतीस फॅशन म्हणणाऱ्यांना लाज कशी वाटत नाही?’
2 एलबीटी वसुली एजन्सीविरुद्ध परभणीमध्ये व्यापाऱ्यांचा मोर्चा
3 बंधाऱ्यांत पाणी सोडण्यासाठी दानवे यांच्या घरापुढे निदर्शने
Just Now!
X