रेणुकामाता मंदिराचे भाविक शोकसागरात, पीठाधीश अप्पा महाराज यांचे निधन, अंत्यविधी कधी होणार ?

अप्पा महाराजांचे पार्थिव रेणुका माता मंदिर परिसरातील त्यांच्या वास्तव्याच्या ठिकाणी ठेवण्यात आले असून, सकाळपासून अंत्य दर्शनासाठी हजारोंच्या संख्येने भाविक दाखल होत आहेत. यातील निकटवर्तीय शिष्यांकडून मिळालेल्या माहितीनुसार अप्पा महाराजांच्या पार्थिवावर शनिवारी सायंकाळी चार वाजता अंत्यसंस्कार करण्यात येणार आहेत. महाराजांच्या पश्चात पत्नी, अंबरीश महाराज व अनिरुद्ध महाराज ही मुले, सुना, मुलगी मीनाक्षी, जावई, नातवंडे व देश-विदेशात विस्तारलेला मोठा शिष्यवर्ग, असा परिवार आहे.

अप्पा महाराज हे मूळचे सोनाई हंसतीर्थ स्वामी अण्णा महाराज यांचे पुत्र होत. अण्णा महाराजांच्या निधनानंतर अप्पा महाराज यांनी त्यांची गादी सांभाळली. दरवर्षी गुरुपोर्णिमेला हरिहर सदगुरु शक्तिपीठ रेणुकामाता मंदिराच्या परिसरात मोठा उत्सव आयोजित केला जातो. अनेक कलावंत शिष्यांकडून सांगीतिक सेवा दिली जाते. या उत्सवाला देश-विदेशातील शिष्य आवर्जून हजेरी लावून गुरुसेवेत दाखल होतात. नवरात्रामध्येही रेणुका माता मंदिरात छत्रपती संभाजीनगर व परिसरातील भाविक मोठ्या संख्येने दर्शनासाठी नऊ-दहा दिवस हजेरी लावतात.