दोनशे वर्षानंतर घरात मुलीचा जन्म,रथातून मिरवणूक काढून केले लेकीचे जल्लोषात स्वागत

मुलगी असली तर घराला शोभा असते याची आम्हाला खंत वाटत होती. आता मुलगी झाली आम्ही आनंदी आहोत असे सांगताना आजोबा लिंबाजी दहिफळे भावुक झाले होते. तर दवाखान्यात आम्ही मिरवणूक काढायचं ठरवलं आणि वाजत गाजत नातीला घरी आणल्याचं मुलीची आज्जी सुरेखा दहिफळे यांनी सांगितले. चार पिढ्यानंतर मुलगी झाल्याने मुलीचे महत्त्व काय आहे हे आम्हाला समजले. आम्ही मुलीला फुलासारखं जपणार आहोत. साधारण दोनशे वर्षानंतर आमच्या घरात मुलीचा जन्म झालाय. मला सर्वजण म्हणतात मुलगा व्हायला पाहिजे पण मुलगी झाल्याचा आनंद वेगळा आहे. मुलीचे प्रेम वडिलांवर जास्त असते त्यामुळे मला मुलीची अपेक्षा असल्याचे तिचे वडील ऋषिकेश दहिफळे म्हणाले.

हजार मुलांमागे आठशे सत्तर मुली

बीड जिल्ह्यात स्त्री जन्मदर 1000 मुलांमागे 841 च्या निचांकी पातळीवर गेला होता. आज त्याच बीड जिल्ह्यात हा जन्मदर वाढत असून 870 पर्यंत आलेला आहे. सामाजिक कार्यकर्त्यांनी केलेली जनजागृती,सरकारच्या विविध योजना आणि कायद्याचा धाक या तिन्ही बाबींमुळे स्त्री जन्मदर बीड जिल्ह्यात आता वाढताना पाहायला मिळत आहे.