लातूर, धाराशिव जिल्ह्यात गारांच्या पावसाचा तडाखा...

लातूर आणि धाराशिव जिल्ह्यात मंगळवारी सायंकाळी विजांच्या कडकडाटासह झालेल्या भीषण गारपिटीमुळे काढणीला आलेली रब्बी पिके जमीनदोस्त होऊन शेतकऱ्यांचे अतोनात नुकसान झाले आहे.

Written by लोकसत्ता टीम

औरंगाबाद

March 17, 2026 21:27 IST

Latur Dharashiv hailstorm crop damage updates

लातूर आणि धाराशिव जिल्ह्यात झालेल्या गारपिटीनंतर शेतात साचलेला गारांचा खच. (छायाचित्र- लोकसत्ता टीम)

छत्रपती संभाजीनगर : धाराशिव जिल्ह्यातील लोहारा तालुक्यात तसेच लातूर शहरासह औसा,देवणी आणि निलंगा तालुक्यात मंगळवारी सायंकाळी वादळी वारे आणि विजांच्या कडकडाटासह गारांचा पाऊस झाला. त्यामुळे काढणीला आलेली पिके जमीनदोस्त झाली. आंब्याचेही मोठे नुकसान झाले.

लोहारा तालुक्यात सायंकाळी साडेपाच वाजण्याचा सुमारास आभाळ भरून आले आणि गारांसह पाऊस झाला. आष्टाकासार, भोसगा, दस्तापूर या भागात गारपीट झाल्याचे सांगण्यात आले. लोहारा शहर, मार्डी, बेंडकाळ, लोहारा खुर्द, मोघा, नागराळ, कास्ती व नागूर परिसरातही पाऊस झाल्याचे सांगण्यात येत आहे.

हेही वाचा

“आई नको…”, चालत्या ट्रेनसमोर उडी मारणाऱ्या आईला ७ वर्षांच्या चिमुकलीने खेचलं मागे; काळजाचा ठोका चुकवणारा थरार

सध्या तालुक्यात रब्बी हंगामातील पिकांची काढणी अंतिम टप्प्यात आहे. मात्र, या अर्ध्या तासाच्या पावसाने मोठे नुकसान झाले आहे. पावसामुळे ज्वारी काळी पडण्याची भीती असून, काढून टाकलेला हरभरा ओला झाला आहे. आंबा आणि द्राक्ष बागायतदारांचे कंबरडे मोडले आहे. गारांच्या मारामुळे आंब्याचा मोहोर आणि छोटी फळे गळून पडली आहेत, तर द्राक्षाचे घड फुटल्याने बागांचे अतोनात नुकसान झाले आहे.

लातूर जिल्ह्यातील देवणी तालुक्यातील वलांडी, औसा तालुक्यातील जमालपूर परिसर तसेच निलंगा तालुक्यातील सरवडी, मुदगड आणि हाडोळी या भागांमध्ये गारपीट झाली. या गारपिटीमुळे शेतातील उभी पिके आडवी झाली असून गहू, ज्वारी आणि हरभरा पिकांचे मोठे नुकसान झाले आहे. काढणीच्या टप्प्यात असलेल्या पिकांना याचा विशेष फटका बसला. लातूर शहरातील काही भागातही रात्री साडेसातच्या सुमारास गारांचा पाऊस झाला.

लातूर, धाराशिव जिल्ह्यात गारांच्या पावसाचा तडाखा…