पाठीराखे तुमचे तसे आमचेही, अधिकाऱ्यांचे जात पडताळीचे काम योग्यच;जरांगे यांच्या उपोषणाबाबत अधिकाऱ्यांच्या बैठकीनंतर सरकार आक्रमकच

जरांगे यांनी प्रतिष्ठेच्या केलेल्या चार रद्द प्रमाणपत्रातील व्यक्तींची उदय सामंत आणि प्रसाद लाड यांनी भेट घेतली. या चौघांना प्रमाणपत्र मिळविण्याचा न्यायालयीन मार्ग सांगितला. तसेच यातील अडचणीही समजावून सांगितल्या. त्या त्यांनाही मान्य असल्याचे सामंत व लाड यांनी सांगितले. मराठवाड्यातील जात पडताळणीमध्ये आलेल्या २०८५१ अर्जापैकी १६ हजार २३ प्रमाणपत्रे दिली आहेत.

केवळ ०.३ टक्के प्रमाणपत्रे देणे बाकी आहेत. सलाईन घेण्यापूर्वी जरांगे यांच्याशी रात्री २.४५ वाजता बोलताना अधिकारी नीट काम करत नाहीत असा उल्लेख वारंवार आला होता. परिस्थिती खरोखर वाईट का, हे तपासण्यासाठी मराठवाड्यातील पोलीस अधिकारी, जिल्हाधिकारी व उपविभागीय अधिकाऱ्यांची बैठक मंगळवारी घेण्यात आली. या बैठकीतून अधिकारी चांगलेच काम करत असल्याचे दिसून आले. ही माहिती पुन्हा एकदा जरांगे यांच्यापर्यंत पोहचवली जाईल. ‘प्रश्न सोडवण्यासाठी आम्ही चार पाऊले नाही तर चार हजार पाऊले पुढे आलो आहोत आता जरांगे यांनीच गैरसमज दूर करून उपोषण सोडण्यासाठी प्रयत्न करावेत,’ असे आवाहन मंत्री सामंत आणि आमदार प्रसाद लाड यांनी केले.

गैरसमज निर्माण करणारी फळी

संवादाची सर्व दारे उघडी असताना आणि सर्व आकडेवारीसह आम्ही माहिती देत आहोत. पण गैरसमज निर्माण करणारी एक फळी जरांगे यांच्या भाेवती गोळा झाली का हे मनाेज जरांगे यांनी समजून घ्यावे आणि ती ‘ सिस्टीम ’ दूर करावी, असे आवाहनही सामंत यांनी केले. मात्र, असे गैरसमज निर्माण करणारे कोण, हे मात्र माहीत नाही. ते त्यांनाच विचारावे लागेल असेही सामंत यांनी एका प्रश्नाच्या उत्तरात सांगितले.

मंत्री परतणार, प्रसाद लाड मुक्कामी

मंत्री उदय सामंत हे आज पुन्हा मतदारसंघात जाणार असून आमदार प्रसाद लाड मात्र मुक्कामी आहेत. मात्र, शिष्टमंडळातील कोणी आंतरवलीस जाणार नसल्याचे बैठकीनंतर स्पष्ट झाले.