बोरगाव आणि दुधनवाडी येथे शंभर टक्के स्व-गणना पूर्ण! मुदखेडचे नायब तहसीलदार मारोती जगताप यांची माहिती

राष्ट्रीय कार्यात सक्रिय सहभाग घेत वरील दोन्ही गावांतील नागरिकांनी डिजिटल माध्यमातून स्वजनगणना पूर्ण करण्यात आली. या उल्लेखनीय उपक्रमाबद्दल प्रशासनाने गावकऱ्यांचे अभिनंदन केले असून इतर गावांनीही या गावांचा आदर्श घ्यावा, असे आवाहन तहसीलदार आनंद देऊळगावकर यांनी केले आहे.

देशभरात सुरू असलेल्या जनगणना प्रक्रियेसाठी प्रगणक व पर्यवेक्षकांची नियुक्ती करण्यात आली असून त्यांना विशेष प्रशिक्षण देण्यात आले आहे. अत्याधुनिक तंत्रज्ञानाचा वापर करून नागरिकांनी स्वतःची माहिती नोंदवावी, यासाठी प्रशासनाकडून जनजागृती मोहीम राबविण्यात येत आहे. या आवाहनाला ग्रामीण भागातून मोठा प्रतिसाद मिळत असल्याचे चित्र दिसून येत आहे.

स्व-गणना ही प्रक्रिया जिल्हाधिकारी तथा प्रधान जनगणना अधिकारी राहुल कर्डीले, उपविभागीय अधिकारी प्रवीण मेंगशेट्टी, तहसीलदर आनंद देऊळगावकर, नायब तहसीलदार मारोतराव जगताप यांच्या मार्गदर्शनाखाली पूर्ण करण्यात आली. पर्यवेक्षक सविता पदमवार, प्रगणक छाया पाटील, प्रगणक ठाकुर यांनी ही मोहीम यशस्वीपणे पूर्ण केली. तसेच गोविंद शिरुरकर, विद्याधर शेवाळकर, सरपंच नवनाथ कदम, भागवत कोल्हे, ग्राम महसूल अधिकारी गलांडे, उल्हास जवळेकर आणि तांत्रिक सहाय्यक गोविंद शिंदे यांनीही सहकार्य केले.

प्रतिक्रिया

मुदखेड तालुक्यातील बोरगाव (सीता) आणि दुधनवाडी (अमरापुर) येथील स्व-गणना १००% पूर्ण झाली असून १६ मे ते १४ जून पर्यंत थेट घरोघरी जाऊन राष्ट्रीय जनगणना कार्यक्रम पूर्ण करावयाचा आहे. मारोती जगताप नायब तहसीलदार, मुदखेड (जिल्हा – नांदेड)