विद्यार्थी संघटनांच्या विरोधामुळे राष्ट्रसेविका समितीचा कार्यक्रम रद्द! नांदेडच्या पीपल्स महाविद्यालयातील प्रकार

नांदेड एज्युकेशन सोसायटीच्या वतीने चालविण्यात येणारे ‘पीपल्स’ हे मराठवाड्यातील पहिले महाविद्यालय आहे. स्वामी रामानंद तीर्थ, गोविंदभाई श्रॉफ, डॉ.सुरेन्द्र बारलिंगे, गांजवे मामा, नरहर कुरुंदकर, म. द. पाध्ये, डॉ.ना.य.डोळे आदींनी नावारूपास आणलेल्या या संस्थेचा अमृतमहोत्सव अलीकडे साजरा झाला.

महाविद्यालयात जागतिक महिला दिनानिमित्त बुधवारी राष्ट्रसेविका समितीसह एका कार्यक्रमाचे आयोजन करण्यात आले होते. या कार्यक्रमाची घोषणा झाल्यानंतर रिपब्लिकन विद्यार्थी सेना, सम्यक विद्यार्थी आंदोलन, वंचित बहुजन आघाडी आणि एसएफआय आदी संघटनांचे विद्यार्थी एकत्र आले. राष्ट्रसेविका समितीचा कार्यक्रम या महाविद्यालयात होता कामा नये, अशी भूमिका त्यांनी महाविद्यालयाच्या प्रशासनासमोर आक्रमकपणे मांडली. हा कार्यक्रम उधळून लावण्याची तयारीही विद्यार्थ्यांनी केली होती. एकंदर परिस्थितीचा अंदाज आल्यानंतर नियोजित कार्यक्रम रद्द करावा लागला.

विद्यार्थी आंदोलनात अक्षयकुमार गायकवाड, कुलदीप राक्षसमारे, प्रबुद्ध काळे, आतिष ढगे, साई पाटील, प्रज्ञा साळवे, आदित्य कांबळे, प्रशांत गाडेकर, निखिल महाबळे यांच्यासह अनेक विद्यार्थी व कार्यकर्ते सहभागी झाले. विद्यार्थ्यांच्या विरोधामुळे पीपल्सच्या परिसरात मोठा गोंधळ निर्माण झाला होता; पण परिस्थिती ओळखून प्रभारी प्राचार्यांनी कार्यक्रम रद्द केल्याची सूचना जारी केली. विद्यार्थी संघटनांनी विरोध दर्शविल्यामुळे कार्यक्रम रद्द करण्यात आला, असे या सूचनेमध्ये म्हटले आहे.