वाळू वाहतूक करणाऱ्या टिप्परच्या धडकेने महिला सरपंचाच्या पतीचा मृत्यू; संतप्त गावकऱ्यांकडून टिप्पर जाळण्याचा प्रयत्न...

परभणीच्या संदलापूरमध्ये अवैध वाळू वाहतूक करणाऱ्या भरधाव टिप्परने महिला सरपंचाच्या पतीला चिरडल्याने त्यांचा मृत्यू झाला असून, संतप्त ग्रामस्थांनी संबंधित टिप्परला आग लावून पेटवून दिले.

Parbhani sand mafia accident Sandlapur | Tipper fire by villagers Parbhani | Sarpanch husband death Purna Parbhani | Illegal sand mining protest Maharashtra

परभणीच्या संदलापूर गावात टिप्परच्या धडकेत पंडित बाळासाहेब म्हात्रे यांचा मृत्यू झाल्यानंतर संतप्त ग्रामस्थांनी पेटवून दिलेला टिप्पर. (छायाचित्र - लोकसत्ता टीम)

परभणी : वाळुची अवैध वाहतूक करणाऱ्या भरधाव टिप्परने पूर्णा तालुक्यातील संदलापूर गावच्या महिला सरपंचांच्या पतीला जोरदार धडक दिल्याची घटना मंगळवारी रात्री घडली असून, या घटनेत त्यांचा दुदैवी मृत्यू झाला आहे. या घटनेनंतर संतप्त ग्रामस्थांनी संबंधित टिप्परला आग लावून पेटवून दिल्याने परिसरात काही काळ तणावाचे वातावरण निर्माण झाले होते.

पोलिसांनी तत्काळ घटनास्थळी धाव घेत परिस्थिती नियंत्रणात आणत चालकाला ताब्यात घेतले असून गावात मोठा पोलीस बंदोबस्त तैनात करण्यात आला आहे. दरम्यान आज बुधवारी (दि.१३) मयताच्या पार्थिवावर शोकाकुल वातावरणात अंत्यसंस्कार करण्यात आले.

पंडित बाळासाहेब म्हात्रे (वय ५५) असे महिला सरपंचांच्या मयत पतीचे नाव आहे. मंगळवारी रात्री सुमारे साडेसात वाजण्याच्या सुमारास संदलापूर गावाजवळील पूर्णा नदीपात्रातून रेती भरून टिप्पर क्र. (एम.एच ४३ / यू / २८५०) हा गावामधून भरधाव वेगाने येत होता. पंडित बाळासाहेब म्हात्रे यांना टिप्परने जोरदार धडक दिली. ही धडक इतकी भीषण होती की रस्त्याच्या बाजूने जात असलेल्या म्हात्रे यांचा जागीच मृत्यू झाला.

हेही वाचा

वेळापत्रक जाहीर; आरोग्य विभागाच्या बदल्या समुपदेशनाद्वारे, मानवीय बाबींसह पसंतीक्रमालाही प्राधान्य…

घटनेची माहिती गावात वाऱ्यासारखी पसरताच संतप्त ग्रामस्थ मोठ्या संख्येने घटनास्थळी जमा झाले. संतापाच्या भरात ग्रामस्थांनी अपघातग्रस्त टिप्परला आग लावून पेटवून दिले. या आगीत टिप्परची केबिन जळाली आहे. यानंतर परिसरात काही काळ तणावपूर्ण परिस्थिती निर्माण झाली होती. ही घटना समजताच उपविभागीय पोलीस अधिकारी डॉ. समाधान पाटील, पोलीस निरीक्षक विलास गोबाडे तसेच पोलीस अधिकारी व कर्मचारी तात्काळ घटनास्थळी दाखल झाले.

पोलिसांनी परिस्थिती नियंत्रणात आणत टिप्पर चालकाला ताब्यात घेतले. मृत पंडित मात्रे यांचा मृतदेह पुढील शवविच्छेदनासाठी जिल्हा रुग्णालय, परभणी येथे पाठविण्यात आला. दरम्यान, घटनेनंतर संदलापूर गावात कोणताही अनुचित प्रकार घडू नये यासाठी मोठा पोलीस बंदोबस्त तैनात करण्यात आला. दरम्यान बुधवारी मयताच्या पार्थिवावर शोकाकुल वातावरणात अंतिम संस्कार करण्यात आले.