परळीत पुन्हा पैशांच्या वादातून खून; मित्राला संपवून मृतदेह रेल्वे सुळावर फेकला

बीड स्थानिक गुन्हे शाखेची कारवाई; सीसीटीव्ही फुटेज आणि तांत्रिक विश्लेषणाने लागला माग

औरंगाबाद

June 4, 2026 16:41 IST

परळी येथील लेंडेवाडी शिवारात रेल्वे रुळावर मृतदेह फेकून खून दडपण्याचा प्रयत्न करणाऱ्या दोन आरोपींना बीड स्थानिक गुन्हे शाखेने गजाआड केले.(संग्रहित छायाचित्र)

छत्रपती संभाजीनगर – परळीमध्ये पैशांच्या वादातून पंधरा दिवसांपूर्वी एका हॉटेलचालकाचा निर्घृण खून करण्यात आल्याची घटना घडली होती. आता पुन्हा पैशांच्या वादातून मित्राचा खून करून मृतदेह रेल्वे रुळावर फेकून आत्महत्या भासवण्याचा प्रकार पोलीस तपासात उघड झाला आहे. परळीजवळील लेंडेवाडी शिवारातील रेल्वे रुळावर १ जून रोजी सापडलेल्या मृतदेहाची आेळख पटली असून, ही घटना खुनाची असल्याचा उलगडा झाला. बीड पोलीस अधीक्षक कार्यालयातील स्थानिक गुन्हे शाखेने घटनेचा तपास करून खून करणाऱ्या आरोपींनाही अटक केल्याची माहिती गुरुवारी (४ जून) दिली. पोलिसांनी खुनाची घटना पैशांच्या देवाण-घेवाण वादातून घडल्याचे सांगितले. २२ मे रोजीच परळीत कारभारी आंधळे (रा. नंदागौळ) यांचा पैशांच्या देवाण-घेवाणच्या वादातून खून करण्यात आल्याची घटना अलिकडेच घडली होती.

४ जून रोजी उलगडा झालेल्या घटनेत अफजलखान उर्फ तोहीद कैरातीखान पठाणचा (वय ३६) खून करण्यात आल्याचे समोर आले. तर याप्रकरणी स्थानिक गुन्हे शाखेच्या पथकाने अटक केलेल्या आरोपींचे नाव ऋषीकेश परमेश्वर फड (वय २७) व गौरव दीपक व्यास (वय २६) असल्याची माहिती पोलीस अधीक्षक कार्यालयाकडून देण्यात आली.

या माहितीनुसार आरोपी ऋषीकेश फड हा परळीतील साेमेश्वरनगरमधील तर गौरव व्यास हा स्नेहनगर भागातील रहिवासी आहेत. परळीतील सरदारनगर येथील अफजलखान हा ३१ मे रोजी त्याच्या मित्रांसमवेत बाहेरगावी गेला होता. परंतु दोन दिवस घरी आला नसल्याने कुुटुंबीय चिंतेत होते. दरम्यान, १ जून रोजी सकाळी ९.३० वाजताच्या सुमारास लेंडेवाडी शिवारातील रेल्वे रुळावर एक मृतदेह आढळून आल्याची माहिती पोलिसांना मिळाली.

हेही वाचा

Nanded Collector : श्यामराव-कमलबाबूंच्या लिंबगावमध्ये जिल्हाधिकार्‍यांचे ‘कदम’, मग मुक्काम!

प्रथमत: आढळलेल्या मृतदेह हा आत्महत्येचा प्रकार असल्याचे वाटले. मात्र, घटनचा बारकाईने तपास केला असता आणि घटनास्थळाच्या आजूबाजूचे सीसीटिव्ही फुटेज, तांत्रिक विश्लेषणाच्या आधारे केलेल्या तपासावरून अफजलखानचे मित्र ऋषीकेश फड व गौरव व्यास यांच्यात संबंध असल्याचे निदर्शनास आले. फड व व्यास यांचा शोध घेऊन त्यांच्याकडे विचारणा केली असता त्यांनी आम्ही पैसे देणे-घेणेच्या कारणावरून अफजलखान उर्फ तोहीद कैरातीखान पठाण याचा दगडाने मारून खून केला व मृतदेह लेंडेवाडी शिवारातील रेल्वेच्या रुळावर फेकून दिला, अशी कबुली दिली. गुन्हे शाखेचे पोलीस निरीक्षक शिवाजी बंटेवाड, पोलीस उपनिरीक्षक सुशांत सुतळे आदींच्या पथकाने ही कारवाई केली.

हॉटेलचालकाचा खून पैशावरून
परळीत पैशांवरून झालेल्या वादातून हाॅटेलचालकाचा २२ मे रोजी मध्यरात्री खून करण्यात आल्याची घटना घडली होती. कारभारी नारायण आंधळे (रा. नंदागौळ) असे मृत हॉटेलचालकाचे नाव असून, याप्रकरणी सचिन राठोड व सुमित पवार या संशयितांविरुद्ध गुन्हा दाखल करण्यात आला आहे.