औरंगाबाद : मोलमजुरीसाठी आलेल्या वस्तीवर सशस्त्र हल्ला करून लूटमार करताना सात दरोडेखोरांकडून दोन महिलांवर सामूहिक अत्याचार करण्यात आला. या प्रकरणी बिडकीन पोलीस ठाण्यात दरोडा, लूटमार व अत्याचाराचा गुन्हा दाखल करण्यात आल्याची माहिती सहायक पोलीस निरीक्षक माने यांनी दिली. पोलीस सूत्रांकडून मिळालेल्या माहितीनुसार मंगळवारी मध्यरात्री दीड ते दोनच्या सुमारास सात जणांच्या टोळीने आलेल्या दरोडेखोरांनी मजुरांच्या वस्तीवर सशस्त्र हल्ला चढवून मारहाण, लुटालूट केली. दोन महिलांवरही सामूहिक अत्याचार केला. दरोडेखोरांनी पुरुष मजुरांना बांधून ठेवले होते. दरोडेखोरांनी मजुरांकडील ४० हजार रुपयांचा ऐवजही लुटून नेला. सकाळी पोलीस अधीक्षक निमित्त गोयल हे इतर सहकाऱ्यांसह घटनास्थळी दाखल झाले. दिवसभर गोयल हे तोंडाळी शिवारात तळ ठोकून होते.
