भाजपचे ३६ अमराठी नगरसेवक; २३ गुजराती, १२ उत्तर भारतीय शहरातील बदलते लोकसंख्येचे प्रमाण व राजकीय समीकरणे याच्या परिणामस्वरूप महानगरपालिकेच्या निवडणुकीत यावेळी अमराठी नगरसेवकांची संख्या पाच वर्षांपूर्वीच्या ६१ नगरसेवकांवरून ७३ वर गेली आहे. यातील तब्बल ३६ अमराठी नगरसेवक भाजपकडून निवडून आले असून त्यात २३ गुजराती, १२ उत्तर भारतीय व एका दक्षिण भारतीयांचा समावेश आहे. भाजपकडून एकही मुस्लीम नगरसेवक निवडून आलेला नाही. शिवसेनेकडून निवडून आलेल्या नगरसेवकांमध्ये चार अमराठी नगरसेवकांचा समावेश आहे. विविध धार्मिक व भाषिक गट नांदत असलेल्या मुंबईत स्थानिक स्वराज्य संस्थेच्या निवडणुकीत नेहमीच मराठी नगरसेवकांचे प्रमाण अधिक राहिले आहे. पाच वर्षांपूर्वी १७ गुजराती, १५ उत्तर भारतीय, तर २१ मुस्लीम नगरसेवक मुंबईकरांचे प्रतिनिधित्व करत होते. यावेळी उत्तर भारतीय नगरसेवकांची संख्या वाढलेली नसली तरी गुजराती नगरसेवकांची संख्या १७ वरून २४ वर पोहोचली आहे. यातील २३ नगरसेवक एकटय़ा भाजपचे, तर एक नगरसेवक शिवसेनेचा आहे. महत्त्वाचे म्हणजे २४ नगरसेवकांपैकी १६ गुजराती नगरसेवक हे पश्चिम उपनगरातून निवडून आले आहेत. पाच वर्षांपूर्वी झालेल्या पालिका निवडणुकांमध्ये कांदिवली आणि मालाड या पट्टय़ात सात हिंदी भाषक, तर संपूर्ण शहरात १५ हिंदी भाषक नगरसेवक निवडून आले होते. त्यामुळेच दहिसर ते मालाड या पट्टय़ात भाजपने ११, तर काँग्रेसकडून तब्बल २३ हिंदी भाषक उमेदवारांना तिकीटवाटप केले. शिवसेनेचे तीन हिंदूी भाषक उमेदवारही याच पट्टय़ात होते. या पट्टय़ातून यावेळीही सात उत्तर भारतीय, तर संपूर्ण शहरातून १४ उत्तर भारतीय नगरसेवक निवडून आले. यात १२ भाजपचे, एक सेनेचा, एक काँग्रेसचा नगरसेवक आहे. उमेदवारांची संख्या शिवसेनेने २२७ पैकी ७ गुजराती, ५ मुस्लीम, ४ उत्तर भारतीय उमेदवार दिले होते. भाजपने १९२ पैकी १२० मराठी, ३० गुजराती, २५ उत्तर भारतीय, तर ५ मुस्लीम होते. काँग्रेसने २२७ पैकी ११५ मराठी, तर २२ गुजराती, ३३ उत्तर भारतीय व ४२ मुस्लीम उमेदवार दिले होते. अमराठी नगरसेवकांची पक्षनिहाय संख्या गुजराती - २३ भाजप, १ शिवसेना उ. भारतीय - १२ भाजप, १ शिवसेना, १ काँग्रेस मुस्लिम - ९ काँग्रेस, १ अपक्ष, २ सेना, ६ राष्ट्रवादी, ६ सपा, ३ एमआयएम द. भारतीय - २ काँग्रेस, २ सेना, १ भाजप ख्रिश्चन - ३ काँग्रेस
