News Flash

हिंदुत्व सांगण्याची लायकी नाही!

संजय राऊत यांचा भाजपवर हल्लाबोल

shivsena, mp sanjay raut
शिवसेना खासदार संजय राऊत (संग्रहित छायाचित्र)

संजय राऊत यांचा भाजपवर हल्लाबोल; देवदेवतांच्या तसबिरी काढण्याच्या आदेशाबाबत माफी मागा

हिंदूत्वाचे नाव घेण्याची सरकारची लायकी नाही असा हल्लाबोल करीत शिवसेना खासदार संजय राऊत यांनी ‘देवदेवतांच्या तसबिरी शासकीय कार्यालयांबाहेर काढा आणि सत्यनारायणाच्या पूजा बंद करा,’ असे आदेश जारी केल्याबद्दल सरकारने जनतेची माफी मागावी, अशी मागणी केली. हिंदूुत्वाच्या रक्षणासाठी आता सरसंघचालक मोहन भागवत यांनीच सरकारमध्ये हस्तक्षेप करावा, असेही मत राऊत यांनी ‘लोकसत्ता’शी बोलताना व्यक्त केले.

मंत्रालयासह सर्व शासकीय कार्यालयांमधून देवदेवतांच्या तसबिरी, प्रतिमा बाहेर काढाव्यात, सत्यनारायण पूजा व अन्य कार्यक्रम करू नयेत, असा फतवा राज्य सरकारने जारी केला आहे. त्याविरोधात राऊत यांनी सरकारला खडे बोल सुनावले आहेत. हिंदूत्व आणि राममंदिर बांधण्याचे आश्वासन देऊन हे सरकार सत्तेवर आले आहे. हिंदू देवदेवतांच्या तसबिरी शासकीय कार्यालयांबाहेर काढण्याचे काम काँग्रेस सरकारच्या काळातही कधी झाले नाही.

जनजागृती आणि राष्ट्रकार्यासाठी प्रेरणा देण्यासाठी लोकमान्य टिळक यांनी सार्वजनिक गणेशोत्सव व शिवजयंती उत्सव सुरू केला. मग आता हे सरकार हिंदू देवदेवतांच्या तसबिरी काढून टाकण्यास का सांगत आहे, असा सवाल राऊत यांनी केला.

हिंदू च्या देवदेवता, गणेशोत्सव, दहीहंडी यांसारख्या सणसमारंभांवर र्निबध आणले जात आहेत आणि मुस्लीम व अन्य धर्मीयांबाबत तसे करण्याची हिंमत सरकार दाखवत नाही, हा मुद्दा निवडणुकीत तापविला जाणार आहे. हिंदूत्ववादी संघटनांमध्येही या परिपत्रकावरून  नाराजी आहे. त्यामुळे हे वादग्रस्त परिपत्रक मागे घेण्याबाबत सरकारचा विचार सुरू आहे.

सरकार हिंमत दाखवणार काय?

मंत्रालयात, अन्य शासकीय कार्यालयांमध्ये नमाजासाठी काही जागा देण्यात आली आहे, विमानतळासह अनेक सार्वजनिक ठिकाणी नमाज पढले जातात. त्याला आम्ही कधीही आक्षेप घेतलेला नाही. पण हिंदू देवदेवतांच्या पूजाअर्चावर आक्षेप घेत तसबिरीही काढून टाकण्याचे आदेश देणारे सरकार हे नमाज थांबविण्याची हिंमत दाखविणार आहे का, अशी विचारणा राऊत यांनी केली.

लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

First Published on January 26, 2017 2:58 am

Web Title: sanjay raut comment on bjp
Next Stories
1 शिवसेनेला ‘त्याच जागी’ भाजपचे ‘प्रत्युत्तर’
2 युती तुटणे काँग्रेसला अडचणीचे
3 प्रजासत्ताक दिनी उमेदवारांची ‘चमकोगिरी’
Just Now!
X