कोल्हापुरी चपलेनंतर प्राडाने आणला चहापासून प्रेरित परफ्यूम; जाणून घ्या किती आहे ‘Infusion de Santal Chai’ परफ्यूमची किंमत

इंस्टाग्रामवरील अधिकृत अकाउंटवरून केलेल्या पोस्टमध्ये प्राडाने म्हटले आहे की, “मलईदार, मसालेदार, तीव्र पण तरीही नाजूक इन्फ्युजन दे सँटल चाय: लेस इन्फ्युजन्स संग्रहातील एक नवीन अध्याय.”

हा परफ्यूम प्राडाच्या ‘लेस इन्फ्युजन्स’ कलेक्शनचा एक भाग आहे आणि त्यात चंदनाच्या सुगंधासोबत मसालेदार चहाचे मिश्रण आहे, ज्याला संत्रा आणि वेलदोड्यांचा सुगंध आहे. प्राडाच्या वेबसाइटवर या परफ्यूमची किंमत सुमारे १९० डॉलर्स (सुमारे १७,००० रुपये) असल्याचे नमूद केले आहे.

प्राडाने हा परफ्यूम बाजारात आणल्याचे इंस्टाग्रामवर शेअर केल्यानंतर यावर मोठ्या प्रमाणात प्रतिक्रिया आल्या आहेत. एका युजरने प्रतिक्रिया देताना लिहिले, “ओह माय गॉड, मला हा परफ्यूम वापरून पाहायचा आहे!! मला हे खूप आवडले.”

दुसऱ्या युजरने पुढे लिहिले, “कोल्हापुरी चप्पल, पैठणी, खाद्यपदार्थ आणि चहा यांसारखी प्रत्येक भारतीय उत्पादने खूप उत्कृष्ट आहेत आणि संपूर्ण जगासाठी पूर्णपणे उपयुक्त आहेत. मेड इन इंडिया.”

दरम्यान, या परफ्यूमच्या लाँचमुळे भारतात प्राडाच्या कोल्हापुरी चप्पल वादाच्या आठवणी ताज्या झाल्या आहेत.

कोल्हापुरी चपलेचा वाद

इटालियन कंपनी प्राडाने जूनमध्ये कोल्हापुरी चप्पलांसारखी दिसणारी हुबेहूब उत्पादने स्वतःच्या ब्रँडच्या नावाखाली बाजारात आणली होती. तसेच मेन्स फॅशन शोमध्ये याचे सादरीकरण केले गेले होते. या फॅशन शोमध्ये प्रत्येक मॉडेलच्या पायात प्राडाने तयार केलेली कोल्हापुरी चपल दिसत होती. ही नक्कल करताना प्राडाने कोल्हापुरी चपलेला किंवा कारागिरांना कोणतेही श्रेय दिले नव्हते, त्यामुळे वाद निर्माण झाला होता.

यानंतर प्राडाने महाराष्ट्र आणि कर्नाटकातील (कोल्हापूर आणि सीमाभाग) कारागिरांच्या सहकार्याने कोल्हापुरी चपलांच्या २,००० जोड्यांची निर्मिती करण्याचा करार केला आहे. यामध्ये स्थानिक कारागिरांचे कौशल्य आणि इटालियन तंत्रज्ञानाचा वापर केला जाणार आहे.

प्राडा कोल्हापुरी चपलांच्या या मर्यादित २,००० जोड्यांची प्रति नग ८०० युरो (सुमारे ८५ हजार रुपये) किमतीने विक्री करणार आहे. याबाबतची माहिती प्राडाचे वरिष्ठ कार्यकारी संचालक लॉरेन्झो बर्टेली यांनी रॉयटर्सला दिली. या चपलांची विक्री फेब्रुवारी २०२६ पासून जगभरातील प्राडाच्या ४० स्टोअर्समध्ये आणि ऑनलाइन पद्धतीने सुरू होणार असल्याचे कंपनीने सांगितले आहे.