नवी दिल्ली : देशातील दूरसंचार क्षेत्रातील ग्राहकसंख्येत जुलै महिन्यात चांगली वाढ असून मोबाइल ग्राहकवाढीत भारती एअरटेलने आघाडी घेत २६.८८ लाख नव्या ग्राहकांची भर घातली आहे. देशातील सर्वांत मोठी दूरसंचार कंपनी असलेल्या रिलायन्स जिओनेही २४.४६ लाख वायरलेस ग्राहक जोडले, अशी माहिती दूरसंचार नियामक प्राधिकरणाने (ट्राय) शुक्रवारी जाहीर केलेल्या मासिक अहवालातून समोर आली.

व्होडाफोन-आयडियाच्या ग्राहकसंख्येतही वाढ झाली असून कंपनीने जुलैमध्ये २.४० लाख वायरलेस ग्राहक जोडले. सरकारी दूरसंचार कंपनी भारत संचार निगम लिमिटेडने (बीएसएनएल) १.६८ लाख मोबाइल ग्राहकांची भर नोंदवली.

वायरलेस ग्राहकसंख्या १२८.७९ कोटींवर

जुलै २०२६ मध्ये देशातील वायरलेस ग्राहकसंख्येत एकूण ५५.३८ लाखांची निव्वळ वाढ झाली. त्यामुळे महिन्याच्या अखेरीस देशातील मोबाइल ग्राहकांची संख्या १२८.७९ कोटींवर पोहोचली. जूनअखेर ही संख्या १२८.२३ कोटी होती. यामध्ये जुलैमध्ये २४.४६ लाख नवे वायरलेस ग्राहक जोडल्याने रिलायन्स जिओची एकूण मोबाइल ग्राहकसंख्या ५०.६० कोटींवर पोहोचली. दुसरीकडे, भारती एअरटेलचा वायरलेस ग्राहकवर्ग ४८.९४ कोटींवर पोहोचला. त्यामुळे ग्राहकवाढीच्या बाबतीत एअरटेलने जुलैमध्ये जिओला मागे टाकले.

व्होडाफोन-आयडियाचीही वाढ

व्होडाफोन-आयडियाच्या ग्राहकसंख्येत जुलैमध्ये २.४० लाखांची भर पडली. त्यामुळे कंपनीचा एकूण मोबाइल ग्राहकवर्ग १९.९० कोटींवर पोहोचला.

बीएसएनएलच्या वायरलेस ग्राहकसंख्येतही १.६८ लाखांची वाढ झाली. जुलैमध्ये सरकारी कंपनीने ग्राहकसंख्या वाढवण्यात सकारात्मक कामगिरी नोंदवली.

जुलैची ग्राहकवाढ — प्रमुख कंपन्या

भारती एअरटेल : २६.८८ लाख नवे ग्राहक; एकूण ४८.९४ कोटी

रिलायन्स जिओ : २४.४६ लाख नवे ग्राहक; एकूण ५०.६० कोटी

व्होडाफोन-आयडिया : २.४० लाख नवे ग्राहक; एकूण १९.९० कोटी

बीएसएनएल : १.६८ लाख नवे ग्राहक

देशातील एकूण वायरलेस ग्राहकसंख्या : १२८.७९ कोटी

जुलैतील एकूण निव्वळ ग्राहकवाढ : ५५.३८ लाख