Amazon Layoffs: अमेझॉनमधील नोकर कपात सुरूच, आता रोबोटिक्स विभागातील शेकडो कर्मचाऱ्यांना कामावरून काढले

‘बिझनेस इनसाइडर’ने ॲमेझॉन रोबोटिक्सचे उपाध्यक्ष स्कॉट ड्रेसर यांनी कर्मचाऱ्यांना पाठवलेला एक अंतर्गत संदेश पाहिला आहे. त्यामध्ये त्यांनी म्हटले आहे की, हे बदल “कठीण पण आवश्यक” होते. मात्र, या ईमेलमध्ये असेही नमूद करण्यात आले आहे की, रोबोटिक विभाग कंपनीसाठी अजूनही प्राथमिकता आहे.

अमेझॉनच्या प्रवक्त्याने बिझनेस इनसाइडरला सांगितले की, “आमच्या टीम ग्राहकांसाठी नवनवीन शोध लावण्यासाठी आणि सेवा देण्यासाठी सक्षम आहेत की नाही, याची खात्री करण्यासाठी आम्ही आमच्या टीमचा नियमित आढावा घेत असतो. आम्ही हे निर्णय सहजपणे घेत नाही आणि ज्या कर्मचाऱ्यांवर या नोकर कपातीचा परिणाम झाला आहे, त्यांना सेव्हरन्स पे, आरोग्य विमा लाभ आणि नोकरी मिळवण्यासाठी मदत देऊन पाठिंबा देण्यास आम्ही वचनबद्ध आहोत.”

अलिकडच्या काही महिन्यांत अमेझॉनने मोठ्या संख्येने कर्मचाऱ्यांची कपात केली आहे. ऑक्टोबर २०२५ मध्ये सुमारे १४,००० कर्मचाऱ्यांपासून याची सुरुवात झाली होती. कंपनी आतापर्यंत एकूण ३०,००० कर्मचाऱ्यांची कपात केली आहे, ज्याची कारणे खर्च कमी करण्याचे उपाय आणि कृत्रिम बुद्धिमत्तेवर (एआय) आधारित उत्पादकता सुधारणा आहेत.

जानेवारीमध्ये अमेझॉनने १६,००० कर्मचाऱ्यांना कामावरून काढून टाकल्यानंतर, त्यांच्या एचआर प्रमुख बेथ गॅलेटी म्हणाल्या होत्या की, कंपनीचा सातत्याने कर्मचाऱ्यांना कामावरून काढून टाकण्याचे धोरण बनवण्याचा विचार नाही. पण, त्यावेळी त्यांनी भविष्यातील कर्मचारी कपातीची शक्यता पूर्णपणे नाकारली नव्हती.

कर्मचाऱ्यांची संख्या कमी करूनही, अमेझॉन एआय डेटा सेंटर्समध्ये मोठ्या प्रमाणात गुंतवणूक करत असल्याचे वृत्त आहे. २०२६ मध्ये त्यांचा भांडवली खर्च जवळजवळ २०० अब्ज डॉलर्सपर्यंत पोहोचण्याचा अंदाज आहे, जो २०२५ मध्ये १२५ अब्ज डॉलर्स होता, जो प्रोजेक्ट रेनियर सारख्या एआय पायाभूत सुविधांवर केंद्रित आहे. शिवाय, ते एआय/एमएल अभियंते, क्लाउड आर्किटेक्ट आणि डेटा सेंटर संबंधित पदांची सक्रियपणे भरती करत आहे.