Epstein Files: बिल गेट्स यांना होतोय पश्चात्ताप; एपस्टाईन फाईल्सबाबत म्हणाले, “त्या प्रत्येक मिनिटाचा…”

गेल्या आठवड्यात अमेरिकन न्याय विभागाने एपस्टाईन फाईल्सशी संबंधित नवीन कागदपत्रे प्रसिद्ध केल्यानंतर बिल गेट्स यांनी हे भाष्य केले आहे. या कागदपत्रांमध्ये एपस्टाईन आणि अनेक हाय-प्रोफाइल व्यक्तींशी संबंधित ईमेल्स समाविष्ट आहेत. त्यापैकी काही ईमेल्स वैयक्तिक संबंध, आर्थिक व्यवहार आणि खाजगी देवाणघेवाण सूचित करतात.

एका कागदपत्रात जेफ्री एपस्टाईनचा एक ड्राफ्ट ईमेल आढळून आला आहे. या ईमेलमध्ये एपस्टाईनने बिल गेट्स यांच्यावर विवाहबाह्य संबंधांचा आरोप केला होता. ईमेलमध्ये एपस्टाईनने असा दावा केला आहे की, रशियन महिलांसोबतच्या कथित लैंगिक संबंधांमुळे उद्भवणाऱ्या परिणामांना सामोरे जाण्यासाठी बिल गेट्स यांना ड्रग्ज मिळवून देण्यापासून ते विवाहित महिलांसोबतच्या त्यांच्या कथित संबंधांना सुलभ करण्यापर्यंत त्याने मदत केली होती.

बुधवारी प्रसारित झालेल्या ‘९ न्यूज ऑस्ट्रेलिया’ला दिलेल्या मुलाखतीत गेट्स म्हणाले, “मी त्याच्याबरोबर घालवलेल्या प्रत्येक मिनिटाला मला पश्चात्ताप होतो आहे आणि मी त्यासाठी माफी मागतो.”

ड्राफ्ट ईमेलमधील आरोप फेटाळून लावत ते म्हणाले, “तो ईमेल कधीही पाठवला गेला नाही. तो ईमेल खोटा आहे.” गेट्स पुढे म्हणाले, “त्यावेळी त्याचा विचार काय होता, हे मला माहीत नाही. तो कोणत्यातरी प्रकारे माझ्यावर हल्ला करण्याचा प्रयत्न करत होता का?”

गेट्स-एपस्टाईन यांची पहिली भेट

गेट्स यांनी ९ न्यूजला सांगितले की, त्यांची एपस्टाईनशी पहिली भेट २०११ मध्ये झाली होती आणि त्यानंतर तीन वर्षांच्या कालावधीत त्यांनी त्याची अनेक वेळा भेट घेतली होती. त्यांनी सांगितले की, त्यांनी एपस्टाईनच्या कॅरिबियन बेटाला कधीही भेट दिली नाही आणि महिलांशी संबंध ठेवल्याचे त्यांनी नाकारले. ते म्हणाले, “महत्त्वाचा मुद्दा हा होता की, त्याला अनेक श्रीमंत लोक ओळखत होते आणि तो म्हणत होता की, तो त्यांना जागतिक आरोग्यासाठी आर्थिक मदत देण्यास तयार करू शकतो. आता मागे वळून पाहता, तो एक निष्फळ प्रयत्न होता.”

ही कागदपत्रे फक्त एवढेच…

ही कागदपत्रे प्रसिद्ध झाल्यानंतर गेट्स यांच्या प्रवक्त्यानेही हे आरोप फेटाळले आहेत. “ही कागदपत्रे फक्त एवढेच दाखवतात की, एपस्टाईनला गेट्स यांच्याशी आपली मैत्री टिकवता आली नसल्याबद्दल निराशा होती आणि त्यांना जाळ्यात अडकवण्यासाठी व बदनाम करण्यासाठी तो कोणत्या थराला गेला होता”, असे प्रवक्त्याने सांगितले.

अत्यंत वेदनादायक क्षणांच्या आठवणी

बिल गेट्स यांच्या घटस्फोटित पत्नी मेलिंडा फ्रेंच गेट्स यांनी अमेरिकेच्या नॅशनल पब्लिक रेडिओशी बोलताना सांगितले की, या कागदपत्रांच्या प्रकाशनामुळे त्यांच्या वैवाहिक जीवनातील वेदनादायक आठवणी पुन्हा जाग्या झाल्या आहेत. “जेव्हा जेव्हा ते तपशील समोर येतात, तेव्हा माझ्यासाठी ते वैयक्तिकरित्या खूप कठीण असते”, असे त्या म्हणाल्या. याचे त्यांनी, “माझ्या वैवाहिक जीवनातील काही अत्यंत वेदनादायक क्षणांच्या आठवणी”, असे वर्णन केले आहे.