नवी दिल्ली: व्यावसायिक एलपीजी सिलिंडर वापरणाऱ्या हॉटेल, रेस्टॉरंट आणि व्यावसायिकांना मोठा दिलासा मिळाला आहे. तेल विपणन कंपन्यांनी १९ किलोग्रॅमच्या व्यावसायिक एलपीजी सिलिंडरच्या दरात २०० रुपयांपेक्षा अधिक कपात केली आहे. या नव्या कपातीनुसार, दिल्लीत सिलिंडर २०२ रुपयांनी तर कोलकाता येथे २०९ रुपयांनी स्वस्त झाला आहे. मात्र, १४.२ किलोग्रॅमच्या घरगुती वापराच्या एलपीजी सिलिंडरच्या दरात कोणताही बदल करण्यात आलेला नसून त्याचे दर जैसे थे ठेवण्यात आले आहेत.
जागतिक बाजारात कच्च्या तेलाच्या आणि इंधनाच्या किमतींमध्ये झालेल्या घडामोडींच्या पार्श्वभूमीवर ही दरकपात लागू करण्यात आली आहे. गेल्या काही महिन्यांत आंतरराष्ट्रीय स्तरावरील तणावामुळे व्यावसायिक गॅसच्या किमतीत सातत्याने वाढ पाहायला मिळाली होती. मात्र, आता लागोपाठ दुसऱ्या महिन्यात व्यावसायिक गॅस सिलिंडरच्या दरात कपात झाल्याने हॉटेल व्यावसायिक आणि लहान-मोठ्या व्यावसायिकांना मोठा आर्थिक दिलासा मिळण्याची शक्यता आहे.
मात्र, जागतिक स्तरावरील समीकरणात झालेल्या सुधारणेमुळे लागोपाठ दुसऱ्या महिन्यात व्यावसायिक गॅसच्या दरात मोठी घसरण पाहायला मिळाली आहे. या नव्या कपातीनंतर कोलकात्यामध्ये १९ किलोग्रॅमचा व्यावसायिक सिलिंडर २,८७२.५० रुपयांना मिळणार आहे. हॉटेल, रेस्टॉरंट, ढाबे आणि इतर लहान-मोठ्या व्यावसायिकांचा उत्पादन खर्च कमी होण्यास या निर्णयामुळे थेट मदत होणार आहे.
दरम्यान, सर्वसामान्यांच्या स्वयंपाकघराचे बजेट ठरवणाऱ्या घरगुती एलपीजी सिलिंडरच्या दरात तेल कंपन्यांनी कोणताही दिलासा दिलेला नाही. घरगुती गॅसचे दर स्थिर ठेवण्यात आले असले, तरी महागाईच्या काळात घरगुती गॅसवरही काही प्रमाणात कपात व्हावी, अशी अपेक्षा ग्राहकांकडून व्यक्त केली जात होती. तेल कंपन्या दर महिन्याच्या पहिल्या दिवशी एलपीजीच्या दरांचा आढावा घेतात, त्यानुसार हे सुधारित दर आजपासून (१ ऑगस्ट) देशभरात लागू झाले आहेत.
शहर ,व्यावसायिक एलपीजी (१९ किलोग्रॅम) घरगुती एलपीजी (१४.२ किलोग्रॅम)
दिल्ली २,७२८.०० ९४२.०० (बदल नाही)
कोलकाता २,८७२.५० ९६८.०० (बदल नाही)
