Elon Musk Net Worth 600 Billion Dollars: एलॉन मस्क सोमवारी ६०० अब्ज डॉलर्स (सुमारे ५० लाख कोटी रुपये) संपत्ती कमावणारे जगातील पहिले व्यक्ती ठरले आहेत. मस्क यांची स्पेसएक्स कंपनी ८०० अब्ज डॉलर्सच्या मूल्यांकनावर शेअर बाजारात सूचीबद्ध होण्याबाबत चर्चा सुरू झाल्याच्या पार्श्वभूमीवर त्यांची संपत्ती वाढली आहे. याबाबत फोर्ब्सने वृत्त दिले आहे.
रॉयटर्स वृत्तसंस्थेने गेल्या आठवड्यात दिलेल्या वृत्तानुसार, एलॉन मस्क ऑक्टोबरमध्ये ५०० अब्ज डॉलर्सची निव्वळ संपत्ती कमावणारे पहिले व्यक्ती ठरले होते. स्पेसएक्समध्ये त्यांची अंदाजे ४२% हिस्सेदारी आहे आणि ही कंपनी पुढील वर्षी अमेरिकन शेअर बाजारात सूचीबद्ध होण्याची तयारी करत आहे.
फोर्ब्सच्या मते, सोमवारपर्यंत स्पेसएक्सच्या मूल्यांकनामुळे मस्क यांच्या संपत्तीत १६८ अब्ज डॉलर्सची वाढ होऊन ती अंदाजे ६७७ अब्ज डॉलर्सवर पोहोचली आहे.
स्पेसएक्स त्यांच्याकडे असलेल्या फाल्कन ९ रॉकेट्समुळे ऑर्बिटल प्रक्षेपण उद्योगातील सर्वात मोठी कंपनी आहे. ती आपल्या स्टारलिंक उपग्रह प्रणालीद्वारे इंटरनेट सेवाही पुरवते. मस्क यांनी काही महिन्यांपूर्वी स्पेसएक्स अंतराळातील कृत्रिम बुद्धिमत्ता डेटा सेंटर्स उभारण्याच्या योजनांवरही भाष्य केले होते. जुलैमध्ये झालेल्या एका पूर्वीच्या दुय्यम समभाग विक्रीमध्ये तिचे मूल्यांकन सुमारे ४०० अब्ज डॉलर्स करण्यात आले होते.
इलेक्ट्रिक वाहन उत्पादक कंपनी टेस्लामधील सुमारे १२% हिस्स्यामुळेही मस्क यांच्या संपत्तीत वाढ झाली आहे. टेस्लाच्या विक्रीत मोठी घट झाली असतानाही, या वर्षी आतापर्यंत टेस्लाच्या शेअर्सच्या किमती १३ टक्क्यांनी वाढल्या आहेत.
नोव्हेंबरमध्ये टेस्लाच्या भागधारकांनी एलॉन मस्क यांच्या १ ट्रिलियन डॉलर्सच्या वेतन योजनेला मंजुरी दिली होती, जी इतिहासातील सर्वात मोठी कॉर्पोरेट वेतन योजना आहे. गुंतवणूकदारांनी इलेक्ट्रिक वाहन उत्पादक कंपनीला कृत्रिम बुद्धिमत्ता आणि रोबोटिक्स क्षेत्रातील एक बलाढ्य कंपनीत रूपांतरित करण्याच्या त्यांच्या दृष्टिकोनाला पाठिंबा दिला आहे. टेस्लामधील मस्क यांच्या हिस्स्याचे मूल्य आता सुमारे १९७ अब्ज डॉलर्स आहे.
त्याचबरोबर, एका मीडिया रिपोर्टनुसार, त्यांची कृत्रिम बुद्धिमत्ता स्टार्टअप कंपनी xAI ही २३० अब्ज डॉलर्सच्या मूल्यांकनावर १५ अब्ज डॉलर्सची नवीन इक्विटी उभारण्यासाठी चर्चा करत आहे.
दरम्यान, मस्क, टेस्ला, स्पेसएक्स आणि xAI यांनी रॉयटर्सकडून प्रतिक्रियेसाठी करण्यात आलेल्या विनंत्यांना कोणताही प्रतिसाद दिला नाही.
