Elon Musk: भारताच्या जीडीपी वाढीचे एलॉन मस्क यांना कौतुक; निर्मला सीतारमण म्हणाल्या, “पण भारतातील विरोधी पक्षांना…”

या कार्यक्रमात बोलताना अर्थमंत्र्यांनी सांगितले की, एलॉन मस्क यांनी आंतरराष्ट्रीय नाणेनिधीच्या (IMF) आकडेवारीचा संदर्भ देऊन भारताच्या योगदानाचा आवाका नमूद केला होता. त्यानुसार, जागतिक जीडीपी वाढीमध्ये चीनचा २६ टक्के वाटा आहे, तर भारताचे योगदान १७ टक्के आहे आणि दोन्ही देशांचे मिळून जागतिक वाढीमध्ये ४३ टक्के योगदान आहे.

“तुमच्यापैकी बरेच जण सोशल मीडियावर खूप सक्रिय असाल, तुम्ही ते पाहिले असेलच. मी हे नाव केवळ उदाहरण म्हणून घेत आहे, त्यामागे काही विशेष कारण नाही. एलॉन मस्क यांनी आयएमएफच्या डेटाचा दाखला देऊन म्हटले होते की, ‘व्वा, हे खरे आहे का?’ त्यांनी नेमके काय म्हटले होते ते मला आठवत नाही. त्यांनी ‘व्वा’ म्हटले होते की दुसरे काहीतरी”, असे अर्थमंत्र्यांनी त्या कार्यक्रमात सांगितले.

त्यानंतर त्यांनी मोठ्या प्रमाणावर व्हायरल होत असलेल्या ग्राफिक्समधील आकडेवारीचा संदर्भ दिला. “जागतिक जीडीपी वाढीमध्ये चीनचा २६ टक्के वाटा आहे, तर भारताचा वाटा १७ टक्के आहे. एकत्रितपणे, जागतिक जीडीपी वाढीपैकी ४३ टक्के वाढ या दोन अर्थव्यवस्थांमधून येते. तुमच्यापैकी कोणी ते ट्विट पाहिले होते का? त्यातून काय संदेश मिळतो?”, असा प्रश्न त्यांनी विचारला.

देशांतर्गत राजकीय वादावर भाष्य करताना अर्थमंत्र्यांनी सांगितले की, विरोधकांनी भारताच्या वाढत्या प्रभावाची दखल घेतली पाहिजे.

“मी संसदेत माझ्या बाजूने हे सांगेन, पण भारतातील विरोधी पक्षांनी हे समजून घेतले पाहिजे की भारताने आता अशा प्रकारची ताकद मिळवली आहे. भारत चीननंतर दुसऱ्या क्रमांकावर आहे. २६ आणि १७ कदाचित हा फरक मोठा असेल, पण आम्ही तो फरक भरून काढू”, असेही त्या पुढे म्हणाल्या.

यापूर्वी शनिवारी, एलॉन मस्क यांनी जागतिक विकासाला चालना देणाऱ्या देशांवरील आंतरराष्ट्रीय नाणेनिधीच्या (IMF) नवीन डेटाचा हवाला देत म्हटले होते की, भारत मोठे योगदान देणाऱ्या देशांमध्ये अमेरिकेच्या पुढे आहे आणि “सत्तेचे संतुलन बदलत आहे.”

मस्क यांनी आंतरराष्ट्रीय नाणेनिधीच्या जानेवारी २०२६ च्या अंदाजानुसार एक चार्ट शेअर केला, ज्यामध्ये २०२६ मध्ये जागतिक वास्तविक जीडीपी वाढीसाठी मोठे योगदान देणाऱ्या १० देशांचा उल्लेख आहे. त्या चार्टसोबत मस्क यांनी लिहिले की, “सत्तेचे संतुलन बदलत आहे.”